Körfəz ölkələrinin liderləri regiondakı gərgin vəziyyəti müzakirə etmək üçün Səudiyyə Ərəbistanında toplaşıb. Məlumata görə, sammitdə ABŞ ilə İran arasında davam edən gərginlik fonunda regional vəziyyət, təhlükəsizlik riskləri və iqtisadi təsirlər əsas müzakirə mövzularıdır. Xüsusilə Hörmüz boğazında yaranmış vəziyyət və bunun qlobal ticarətə təsiri diqqət mərkəzindədir.

Nyu-Yorkda keçirilən Nüvə Silahlarının Yayılmaması Müqaviləsinin icrasına dair 11-ci baxış konfransında İranın sədr müavinlərindən biri kimi seçilməsi Vaşinqtonun sərt reaksiyasına səbəb olub. ABŞ rəsmiləri bu qərarı tənqid edərək bildiriblər ki, İranın belə bir vəzifəyə seçilməsi müqavilənin nüfuzuna zərbə vurur. ABŞ Dövlət Departamentinin nümayəndələri Tehranın beynəlxalq öhdəliklərə əməl etmədiyini və Beynəlxalq Atom Enerjisi Agentliyi ilə əməkdaşlıqdan yayınmaqda ittiham olunduğunu qeyd ediblər.