Bakı, AzerVoice

Əvvəlki tədqiqatlar Marsda qədim çay vadiləri və çöküntü süxurlarının olduğunu sübut etsə də, okeanların mövcudluğu uzun müddət müzakirə mövzusu olub. Lakin Çinin Zhurong roverindən əldə edilən son məlumatlar bu mövzuda yeni və güclü sübutlar təqdim edir.

AzerVoice xəbər verir ki , Zhurong roveri Marsın Utopia Planitia bölgəsində yeraltı görüntüləmə aparıb. Penn State Universitetindən Dr. Benjamin Kardenas bu bölgənin peyk görüntülərində paleosahil xətləri ilə xəritələndiyini bildirir.

Elm adamları Marsın şimal ovalıqlarından əldə edilən yeraltı məlumatların Yerdəki sahil bölgələrində istifadə edilən radar ölçmələri ilə oxşarlığını vurğulayırlar. Tədqiqatçılar yeraltı strukturların bir zamanlar okeana doğru meyl etdiyini müəyyən ediblər. Bu, Marsda keçmişdə geniş su hövzələrinin olduğunu göstərən güclü sübutlardan biridir.

Zhurong roverindən toplanan məlumatlar Marsdakı sahil xətlərinin zamanla dəyişdiyini ortaya qoyur. Dr. Kardenas qeyd edir ki, “Məlumatlar sahil xəttinin ən azı 1,3 km şimala doğru irəlilədiyini göstərir.”

"Bu sadəcə geoloji bir forma deyil. Burada biz gelgitlərin, dalğaların və çöküntü axınının izlərini görürük. Bu isə o deməkdir ki, proses uzun müddət aktiv olub." - deyə o, bu kəşfin böyük elmi əhəmiyyət daşıdığını vurğulayaraq əlavə edib.

Tədqiqatçılar müəyyən edilən geoloji strukturların başqa proseslər nəticəsində formalaşdığı ehtimalını nəzərdən keçirsələr də, əldə edilən məlumatlar vulkanik fəaliyyət, çay eroziyası və ya külək təsiri ilə izah edilə bilmir.

Bu tapıntılar Marsda keçmiş həyatın mümkünlüyünü araşdıran elm adamları üçün böyük maraq doğurur. Sahillər su, hava və quru arasında qarşılıqlı əlaqənin baş verdiyi yerlərdir. Alimlərin fikrincə, Yer kürəsində də həyat məhz bu cür mühitlərdə yaranıb. Bu səbəbdən, Marsda qədim həyat izlərini tapmaq üçün həmin bölgələr yeni missiyalar üçün əsas hədəf ola bilər.