BAKI,VOA
1997-ci il iyunun 28-də keçirilən ağır çəki üzrə revanş döyüşündə amerikalı boksçu Mayk Tayson rəqibi Evander Holifildin qulağını dişləyərək qopardığı üçün diskvalifikasiya edilib. Hadisə Taysonun boksdan uzaqlaşdırılması ilə nəticələnib və idman tarixinin ən mübahisəli anlarından biri kimi yadda qalıb.
Mayk Tayson peşəkar karyerasının ilk illərində sürətlə dünya şöhrəti qazanmışdı. O, 1986-cı ildə cəmi 20 yaşında Trevor Berbiki məğlub edərək ağır çəki üzrə dünya çempionu titulunu qazanan ən gənc boksçu olmuşdu.
Lakin 1989-cu ildən etibarən onun karyerasında eniş dövrü başladı. Bu müddətdə şəxsi həyatı və davranışları tez-tez gündəmə gəlirdi. Tayson aktrisa Robin Givenslə evlənib daha sonra boşandı. Boşanma prosesində ona ailədaxili zorakılıq ittihamları irəli sürüldü. Bundan başqa, o, menecerini işdən çıxararaq məhkəməyə verdi, küçə davasında əlini sındırdı və iki avtomobil qəzasına düşdü. Həmin qəzalardan birinin intihara cəhd olduğu barədə məlumatlar yayılmışdı.
Sonradan Tayson məşqçisi Kevin Runini də işdən uzaqlaşdırdı və onun yerinə tanınmış promouter Don Kinqi gətirdi.
Şəxsi problemlər onun idman nəticələrinə də təsir göstərdi. Uzun müddət məğlubedilməz hesab olunan Tayson 1990-cı il fevralın 11-də böyük sensasiya ilə qarşılaşdı. O, 42-yə 1 əmsallı autsayder hesab edilən Ceyms "Baster" Duqlasa nokautla uduzaraq ağır çəki üzrə dünya çempionu titulunu itirdi.
1991-ci ildə isə Tayson ABŞ-ın İndiana ştatının İndianapolis şəhərində keçirilən gözəllik müsabiqəsinin iştirakçısı Deziri Vaşinqtonu zorlamaqda ittiham olundu. O, 1992-ci il fevralın 10-da təqsirli bilinərək həbs cəzasına məhkum edildi və federal həbsxanada üç il bir ay cəza çəkdi.
Azadlığa çıxdıqdan sonra Tayson yenidən dünya çempionu kəmərlərini geri qaytardı və növbəti böyük döyüş üçün keçmiş dünya çempionu Evander Holifildlə qarşılaşmağa hazırlaşdı. Həmin dövrdə bir nömrəli iddiaçı Lennoks Lyuis olsa da, Tayson onunla döyüşməkdən imtina etmişdi və nəticədə Holifild əsas rəqib seçildi.
Corciya ştatından olan Evander Holifild sağlam həyat tərzi sürən, dini inanclarına sadiq idmançı kimi tanınırdı. O, 1994-cü ildə peşəkar karyerasını başa vurduğunu açıqlasa da, böyük məbləğli qonorar onu yenidən rinqə qaytardı.
1996-cı il noyabrın 9-da keçirilən ilk döyüşdə autsayder hesab olunan Holifild böyük sensasiyaya imza ataraq Taysonu 11-ci raundda texniki nokautla məğlub etdi və Dünya Boks Assosiasiyasının çempionluq kəmərini qazandı.
1997-ci il iyunun 28-də keçirilən revanş görüşünə Holifild daha yaxşı formada çıxmışdı. Birinci raundda o, güclü zərbələrlə Taysona ciddi təzyiq göstərdi. Tayson isə məşqçilərinin vəd etdiyi taktiki boks üslubundan istifadə etmək əvəzinə nizamsız hücumlara üstünlük verdi. Raundun sonunda azarkeşlər Holifildin adını səsləndirərək əvvəllər sevimli sayılan Taysona qarşı münasibətlərini dəyişdiklərini nümayiş etdirdilər.
İkinci raund zamanı Holifild başı ilə Taysonun üz nahiyəsinə toxundu və bunun nəticəsində Taysonun sağ gözünün üst hissəsində kəsik yarandı.
Üçüncü raundda isə hadisələr tamamilə nəzarətdən çıxdı. Mayk Tayson ağız qoruyucusunu çıxararaq Evander Holifildin sağ qulağını dişlədi və qulağın bir hissəsini qopardıqdan sonra onu rinqə tüpürdü.
Holifild ciddi ağrı hiss etsə də, qısa fasilədən sonra hakim döyüşün davam etdirilməsinə qərar verdi. Lakin döyüş bərpa edildikdən sonra Tayson rəqibinin digər qulağını da dişlədi.
Üçüncü raundun başa çatmasına 10 saniyə qalmış hakim Mayk Taysonu diskvalifikasiya etdi. Döyüş üçün nəzərdə tutulan 30 milyon ABŞ dolları məbləğində qonorar müvəqqəti olaraq donduruldu və Nevada ştatının boks üzrə səlahiyyətli qurumları insidentlə bağlı araşdırmaya başladılar.
Hadisədən sonra Mayk Tayson boksdan uzaqlaşdırıldı və bu insident peşəkar boks tarixinin ən qalmaqallı və ən çox müzakirə olunan hadisələrindən biri kimi idman salnaməsinə düşdü.