Bakı, AzerVoice
Türkiyənin kənd təsərrüfatı sektoru bu ilin yanvar-iyun dövründə 17,5 milyard dollarlıq ixracatla bütün zamanların ən yüksək nəticəsini əldə edib.
AzerVoice xəbər verir ki, Türkiyə İxracatçılar Məclisinin (TİM) məlumatlarına görə, Türkiyənin ixracatı ilin ilk yarısında əvvəlki ilin eyni dövrünə görə iki faiz artaraq 125,4 milyard dollara çatıb.
Bu dövrdə kənd təsərrüfatı sektoru 17,5 milyard dollarla ən yüksək ixracatını əldə edib. Xarici satışlar keçən ilin eyni dövrü ilə müqayisədə 5,4 % artarkən, bu sahədə fəaliyyət göstərən 10 sektordan 5-i ixrac rekordları qırıb.
Onu da qeyd edək ki, Türkiyənin kənd təsərrüfatı məhsulları ixracı geosiyasi risklərin və qlobal ərzaq təminatı problemlərinin hökm sürdüyü yanvar-iyun dövründə zirvəyə yüksəlib.
Türkiyənin taxıl, paxlalı bitkilər, yağlı bitkilər və onların məhsullarının ixracı üzrə 1,1 milyard dollarlıq rəqəmlə İraq birinci sırada gəlir.
Təzə meyvə-tərəvəz sektorunda 436,6 milyon dollarla Rusiya Federasiyası birinci yerdədir. Emal edilmiş meyvə-tərəvəz məhsulları üzrə isə ABŞ-a 208,8 milyon dollarlıq ixracat həyata keçirilib.
Quru meyvə və emal məhsullarında Almaniya 105,8 milyon dollarla birinci, su məhsulları və emal edilmiş heyvan mənşəli məhsullar sektorunda ən çox ixrac edilən ölkə isə 302,8 milyon dollarla İraq oldu.
Türkiyənin şəhərləri üzrə isə, İstanbuldan 1,7 milyard dollar dəyərində taxıl, paxlalı bitkilər, yağlı bitkilər və bunların emal məhsulları və 364,4 milyon dollar dəyərində meyvə-tərəvəz məhsulları, Mersindən 429 milyon dollarlıq təzə meyvə-tərəvəz məhsulları, İzmirdən 283,5 milyon dollar dəyərində quru meyvə və onun emal məhsulları, Muğladan 385,3 milyon dollar dəyərində su məhsulları və emal edilmiş heyvan mənşəli məhsullar ixrac edilib.
