Beynəlxalq Padel Federasiyası (FIP) və Qətər Padel Federasiyası dünən rəsmi bəyanat yayaraq Dohanın 2026 və 2028-ci illərdə keçiriləcək padel üzrə dünya çempionatlarına (FIP World Cup) ev sahibliyi edəcəyini elan ediblər. Milli komandalar üçün ən nüfuzlu beynəlxalq turnir sayılan bu yarışların hər iki nəşri Dohanın məşhur Xəlifə Beynəlxalq Tennis və Skuoş Kompleksində təşkil olunacaq.
ArabAZ xəbər verir ki, hər iki dünya çempionatında planetin ən güclü 16 kişi və 16 qadın milli komandası dünya titulu uğrunda mübarizə aparacaq. FIP-in rəsmi təqviminə əsasən, builki 2026-cı il dünya çempionatı 2-7 noyabr tarixlərində keçiriləcək. Dohanın ardıcıl iki turnir üçün ev sahibi seçilməsinə səbəb kimi şəhərin yüksək idman infrastrukturu, idmançılar üçün yaradılan ideal şərait, yüksək təhlükəsizlik standartları, maliyyə zəmanətləri və Qətərin zəngin idman mirası göstərilib.
Tarixi rekord: 1.2 milyon avroluq bərabər mükafat fondu
Turnirin nüfuzunu və miqyasını göstərən ən mühüm amillərdən biri mükafat fondu ilə bağlıdır. Padel tarixi üçün rekord sayılan bu pul mükafatları kişi və qadın yarışları arasında tam bərabər şəkildə bölünəcək. 2026-cı il çempionatında rekord həddə – 1.2 milyon avro, 2028-ci ildə isə bu rəqəm daha da artaraq 1.35 milyon avroya çatacaq. Bu, rəsmi padel yarışları tarixində indiyə qədər təklif olunan ən yüksək mükafat fondudur.
Beynəlxalq Padel Federasiyasının Prezidenti Luici Karraro bu qərarın idmanın gələcəyinə yönəldiyini bildirib. Karraro Qətərin dünya səviyyəli tədbirlərə ev sahibliyi etmək bacarığını dəfələrlə sübut etdiyini və Dohanın qlobal padel idmanının rəsmi evlərindən birinə çevrildiyini vurğulayıb.
Qətərin uğurlu idman diplomatiyası
Qətər Padel Federasiyasının Baş katibi Tariq Zeynal isə qərarla bağlı qürur hissi keçirdiklərini bəyan edib. Zeynal qeyd edib ki, Dohanın ardıcıl iki mövsüm üçün seçilməsi beynəlxalq birliyin Qətərin təşkilatçılıq qabiliyyətinə olan mütləq etimadının göstəricisidir.
Xəlifə idman kompleksi bundan əvvəl dörd dəfə “Qatar Major Premier Padel” turnirinə və sonuncu Dünya Komanda Çempionatına uğurla ev sahibliyi edib. Qətər rəsmiləri bu təcrübədən yararlanaraq həm 2026, həm də 2028-ci ildə gələn idmançı və azarkeşlər üçün qlobal standartlara uyğun unikal idman festivalı yaşadacaqlarını vəd ediblər.