BAKI,VOA, Fərid Mikayılov

İran Futbol Federasiyası rəsmi bəyanat yayaraq, ABŞ-ı builki Dünya Çempionatında iranlı azarkeşlərin oyunlara gəlişini qəsdən əngəlləməkdə ittiham edib.

VOA xəbər verir ki, sənəddə qeyd olunur ki, turnirin ev sahiblərindən biri olan ABŞ, rəsmi Tehrana qrup mərhələsi üçün ayrılan rəsmi bilet kvotasını gözlənilmədən ləğv edib.

İki ölkə arasında cari ilin fevral ayının sonunda ABŞ və İsrailin İrana qarşı başlatdığı hərbi əməliyyatlardan sonra yaranan müharibə və gərgin diplomatik böhran idman arenasına da sıçrayıb.

Federasiyanın rəsmi açıqlamasına görə, rəsmi Vaşinqton milli komandanın texniki və dəstək heyətinin bir hissəsinə viza verməkdən imtina etməklə yanaşı, azarkeşlər üçün də bir sıra bürokratik maneələr yaradıb. Gərginlik səbəbindən İran millisi təlim-məşq bazasını ABŞ-ın Arizona ştatından Meksikanın Tixuana şəhərinə köçürməli olub.

FİFA reqlamentinə əsasən, hər bir iştirakçı federasiyaya oyunların keçiriləcəyi stadionların ümumi tutumunun 8 faizi qədər bilet kvotası ayrılmalıdır. İran tərəfi turnirin başlanmasına 3 gündən az vaxt qalmış verilən bu qərardan əvvəl ABŞ-da baş tutacaq Yeni Zelandiya (15 iyun, Los-Anceles), Belçika (21 iyun, Los-Anceles) və Misir (26 iyun, Sietl) matçları üçün biletlərin rəsmi satışına artıq başladıqlarını və bir çox azarkeşin səyahət planlarını tamamladığını bildirib:

“Lakin gözlənilməz bir addımla İran Futbol Federasiyasına verilən kvota tamamilə geri çağırılıb. Mövcud şərait daxilində federasiyamız milli komandanın azarkeşlərinə tək bir bilet bəxş edə bilməyəcək vəziyyətdədir.”