BAKI,AzerVoice, Fərid Mikayılov
Avropa futbolunun ali qurumu UEFA, BMT Təhqiqat Komissiyasının İsrailin Qəzzada soyqırım törətdiyi barədə hesabatından sonra gələn həftə fövqəladə iclas keçirəcək.
AzerVoice xəbər verir ki, İcraiyyə Komitəsinin böyük əksəriyyəti İsrailin üzvlüyünün dayandırılmasının tərəfdarıdır.
UEFA-nın iclasında İsrailin üzvlüyünün dayandırılması ilə bağlı qərar qəbul edilərsə, ölkə 2026 FIFA Dünya Kuboku seçmə mərhələsinə qatıla bilməyəcək. Bu halda FIFA üzərində də İsrailin beynəlxalq yarışlardan kənarlaşdırılması istiqamətində təzyiqlərin artacağı gözlənilir.
BMT İnsan Haqları Ofisi bu həftə həm FIFA-ya, həm də UEFA-ya müraciət edərək, İsrailin beynəlxalq futboldan kənarlaşdırılmasını “Qəzzada davam edən soyqırıma cavab olaraq atılmalı olan zəruri addım” adlandırıb. BMT ekspertləri vurğulayıblar ki, idman “hər şey normal imiş” kimi görünməməli və ciddi insan haqları pozuntularına yol verən dövlətlərin milli komandaları turnirlərdən kənarlaşdırılmalıdır.
İsrail hazırda 2026 Dünya Kuboku Avropa seçmələrinin I qrupunda Norveç və İtaliyanın ardından üçüncü sırada qərarlaşıb. Komanda 11 oktyabrda Osloda Norveçlə, 14 oktyabrda isə İtaliya ilə səfər matçına çıxacaq. Norveç Futbol Federasiyası İsraillə keçiriləcək oyundan əldə ediləcək gəliri “Sərhədsiz Həkimlər” təşkilatına bağışlayacağını açıqlayıb.
Avropa kuboklarında mübarizə aparan yeganə İsrail klubu “Makkabi Tel-Əviv”dir. Yunanıstanın PAOK komandası ilə keçirilən görüşdə (0:0) ev sahibi komandanın azarkeşləri “Soyqırımı dayandırın” və “İsrailə qırmızı kart” yazılı pankartlar nümayiş etdiriblər. Matçdan əvvəl isə minlərlə azarkeşin imzaladığı və “Soyqırım təmsilçiləri ilə ədalətli oyun ola bilməz” ifadəsinin yer aldığı müraciət UEFA-ya təqdim olunub.