BAKI,VOA Orxan Qədirzadə

Türkiyənin əsas müxalifət qüvvələrindən olan Cümhuriyyət Xalq Partiyasında daxili proseslərlə bağlı müzakirələr davam edir. Partiyada daha əvvəl açıqlanan ilk intizam qərarlarından sonra yeni ixrac qərarlarının gündəmə gəldiyi iddia olunur.

Türkiyəli jurnalist Sinan Burhan televiziya proqramında çıxışı zamanı partiya daxilində yeni intizam tədbirlərinin müzakirə olunduğunu bildirib. Onun sözlərinə görə, Kamal Kılıçdaroğlu tərəfindən irəli sürüldüyü iddia olunan “təmizlənmə prosesi” çərçivəsində bəzi şəxslərin adları müzakirə olunur.

Jurnalistin paylaşdığı kulis məlumatına əsasən, mümkün ixrac siyahısında bir sıra tanınmış siyasətçilərin adları yer alıb. Həmin siyahıda Mahmut Tanal, Adnan Beker, Cemal Enginyurt, Ümit Dikbayır, Seyit Torun və Gökan Zeybek göstərilib.

Eyni iddialara görə, bəzi bələdiyyə sədrlərinin də adları müzakirə olunan şəxslər arasında yer alır. Bunlar arasında Mehmet Murat Çalık, Oya Tekin, Tanju Özcan, Rıza Akpolat, Muhittin Böcek, Onursal Adıgüzel və Hasan Akgün var.

Sinan Burhan bildirib ki, daha əvvəl səsləndirdiyi bəzi adlarla bağlı proqnozlar öz təsdiqini tapıb. O, partiya rəhbərliyinin prosesi qarşıdurmadan uzaq şəkildə idarə etməyə çalışdığını iddia edib.

Hazırda CHP rəhbərliyi tərəfindən sözügedən siyahı ilə bağlı rəsmi açıqlama verilməyib. Buna görə də adı çəkilən şəxslərlə bağlı mümkün intizam tədbirləri və ya ixrac qərarlarının qəbul olunub-olunmayacağı hələlik dəqiq deyil.

Partiya daxilində baş verən proseslərin yaxın günlərdə Türkiyə siyasi gündəminin əsas mövzularından biri olaraq qalacağı gözlənilir.