BAKI, AzerVoice, Fərid Mikayılov

Türkiyə Prezidenti Rəcəb Tayyib Ərdoğan 2025–2026-cı tədris ilinin açılış mərasimində çıxış edərək, İzmir şəhərində baş verən silahlı hücumla bağlı ilk açıqlamasını verib.

AzerVoice xəbər verir ki, Ərdoğan hadisəni qınayaraq şəhid olan polis əməkdaşlarına rəhmət, yaralılara isə şəfa diləyib.

Ərdoğan çıxışında bildirib ki, hücum nəticəsində polis başmüfəttişi Aydemir və polis əməkdaşı Akın şəhid olub.

“İzmirdən hamımızı sarsıdan dərin bir xəbər aldıq. Şəhid olan polis əməkdaşlarımıza Allahdan rəhmət, yaralı yoldaşlarımıza şəfa diləyirəm. Hücumla əlaqəsi olan 16 yaşlı bir şəxs yaxalanıb, əlaqələri araşdırılır”- deyə Ərdoğan bildirib.

O, bütün təhlükəsizlik orqanına başsağlığı verib və hadisənin terror xarakteri daşıdığını vurğulayıb.

Çıxışının davamında Ərdoğan yeni tədris ili ilə bağlı da mühüm açıqlamalar verib. Onun sözlərinə görə:

• 2025-ci ildə təhsilə ayrılan büdcə 2 trilyon 186 milyard lirə təşkil edir.
• Bu günədək 821 mindən çox müəllim təyinat alıb.
• Fatih Projesi çərçivəsində 629 min 277 interaktiv lövhə quraşdırılıb, 2 milyon 407 min planşet şagirdlərə paylanıb.
• Laboratoriyaların sayı 21 min 849-dan 49 min 666-ya, elm və incəsənət mərkəzlərinin sayı isə son 22 ildə 20 dəfə artaraq 364-ə çatdırılıb”- deyə o vurğulayıb.

Ərdoğan gənclərə səslənərək onların ölkənin gələcəyində əsas rol oynayacağını vurğulayıb.

Türkiyə Prezidenti həmçinin gəncləri elmə maraqlı olmağa, ədalət və sülh dəyərlərinə sahib çıxmağa çağırıb.