Son onillik ərzində Səudiyyə Ərəbistanı həyata keçirdiyi genişmiqyaslı iqtisadi və inkişaf yönümlü islahatlar sayəsində xüsusi rəqabətədavamlılıq modeli formalaşdırıb və bu uğur Dünya Bankı Qrupu tərəfindən Krallığın iqtisadi islahatlar üzrə qlobal bilik mərkəzi seçilməsinə gətirib çıxarıb. Bu transformasiya 2016-cı ildə iqtisadiyyatı şaxələndirmək, qlobal rəqabət qabiliyyətini gücləndirmək və Krallığı qlobal ticarət və biznes mərkəzinə çevirmək məqsədi daşıyan "Səudiyyə Vizyonu 2030" çərçivəsində başlayıb.

Səudiyyə Ərəbistanı 2026-cı ilin 22–23 aprel tarixlərində Dünya İqtisadi Forumunun “Qlobal Əməkdaşlıq və Artım” mövzusunda yüksək səviyyəli beynəlxalq toplantısına ev sahibliyi edəcək. “Ortaq zəminin qurulması və artımın canlandırılması” şüarı ilə keçiriləcək toplantı Ciddə şəhərində baş tutacaq. Bu barədə qərar İsveçrənin Davos şəhərində keçirilən Dünya İqtisadi Forumunun 56-cı illik toplantısının bağlanış günündə açıqlanıb.