ABŞ-ın keçmiş milli təhlükəsizlik müşaviri Con Bolton məxfi sənədlərlə bağlı cinayət işi üzrə günahını etiraf edib. O, federal məhkəmədə bir ittiham maddəsi üzrə təqsirini qəbul edərək peşman olduğunu bildirib. Razılaşmaya əsasən, prokurorluq onun beş ildən artıq həbs cəzası almasını tələb etməyəcək. Bundan əlavə, Bolton 2,25 milyon ABŞ dolları məbləğində cərimə ödəyəcək. Keçmiş müşavir əvvəlcə milli müdafiəyə aid çox məxfi məlumatların ötürülməsi və saxlanılması ilə bağlı 18 maddə üzrə ittiham olunmuşdu. İstintaq onun məxfi sənədləri elektron poçt vasitəsilə səlahiyyəti olmayan şəxslərə göndərdiyini iddia edir. Con Bolton son illərdə Donald Trampın siyasətini, xüsusilə İranla bağlı mövqeyini açıq şəkildə tənqid edən tanınmış simalardan biri olub. Məhkəmə işi ABŞ-da məxfi dövlət sənədlərinin qorunması ilə bağlı növbəti səs-küylü proseslərdən biri kimi qiymətləndirilir.

ABŞ Prezidenti Donald Tramp rəqəmsal xidmət vergisi tətbiq edən ölkələrə qarşı sərt ticarət tədbirləri ilə çıxış edib. O bildirib ki, Amerika şirkətlərinə belə vergi tətbiq edən dövlətlərdən gətirilən bütün mallara 100 faizlik gömrük rüsumu qoyula bilər. Trampın sözlərinə görə, bu qərar ABŞ-la mövcud olan ticarət razılaşmalarından üstün tutulacaq. Açıqlama beynəlxalq ticarət münasibətlərində yeni gərginlik yarada bilər. Rəqəmsal xidmət vergisi əsasən iri texnologiya şirkətlərinin xarici bazarlardakı gəlirlərinə tətbiq olunur. Vaşinqton isə bu cür addımları Amerika şirkətlərinə qarşı ayrı-seçkilik kimi qiymətləndirir. Trampın bəyanatı ticarət tərəfdaşlarına xəbərdarlıq kimi dəyərləndirilir. Bu mövqenin yaxın günlərdə beynəlxalq iqtisadi gündəmdə geniş müzakirə olunacağı gözlənilir.

ABŞ Prezidenti Donald Tramp İranı Hörmüz boğazında gəmilərə qarşı pilotsuz uçuş aparatlarından istifadə etməkdə ittiham edib. O bildirib ki, İranın buraxdığı dörd pilotsuz uçuş aparatından biri yük gəmisinə zərbə endirib, digər üçü isə ABŞ qüvvələri tərəfindən vurulub. Tramp bu hadisəni atəşkəs razılaşmasının pozulması kimi qiymətləndirib. Bununla yanaşı, o, paylaşımında hansı konkret insidenti nəzərdə tutduğunu açıqlamayıb. Bir gün əvvəl Oman sahillərində baş vermiş gəmi hücumu ilə bağlı ABŞ İranı məsul hesab etsə də, Tehran bu ittihamı qəbul etməyib. Hörmüz boğazında son günlər baş verən hadisələr beynəlxalq gəmiçiliyin təhlükəsizliyi ilə bağlı narahatlıqları artırır. Regionda gərginlik fonunda qarşılıqlı ittihamlar davam edir. Hadisələrin müstəqil təsdiqi ilə bağlı hələlik rəsmi məlumat yoxdur.

ABŞ-nin Vitse-prezidenti Cey di Vens Kaliforniyadak, ABŞ-nin daxili siyasi dairələri və tarixi skandalları ilə bağlı sensasion iddialarla çıxış edib. Müasir medianın və siyasi mühitin hiper-partizan və fraqmentləşmiş strukturuna diqqət çəkən Vens, "Əgər Uotergeyt skandalı sabah baş versəydi, bu sadəcə 12 saatlıq bir xəbər gündəmi olaraq qalardı. Bu hadisənin bir prezidentin istefasına yol aça biləcəyi düşüncəsi bu gün üçün sadəcə çılğınlıqdır" deyib.

ABŞ administrasiyası Türkiyəyə təxminən 700 milyon ABŞ dolları dəyərində reaktiv təyyarə mühərriklərinin satışına dair rəsmi bildirişi ABŞ Konqresinə təqdim edib. Bu addım Vaşinqton və Ankara arasında müdafiə sənayesi sahəsində əməkdaşlığın genişlənməsi istiqamətində atılan mühüm mərhələ kimi qiymətləndirilir.

Venesuelada baş vermiş dağıdıcı zəlzələlərdən sonra beynəlxalq yardımın təşkilində siyasi və iqtisadi amillər də gündəmə gəlib. Mütəxəssislər hesab edirlər ki, ölkəyə tətbiq olunan və sonradan qismən yumşaldılan sanksiyalar humanitar yardımın çatdırılması prosesinə təsir göstərə bilər. Hazırkı hökumətin ABŞ administrasiyası ilə münasibətlərinin sabitləşməsi iqtisadi əlaqələrin müəyyən qədər bərpasına şərait yaradıb. Bunun nəticəsində ABŞ şirkətləri və maliyyə qurumları ilə əməkdaşlıq imkanları genişlənib. Bununla belə, yardım təşkilatları fəlakət bölgələrinə maliyyə və logistika dəstəyinin maneəsiz çatdırılması məsələsini diqqətdə saxlayırlar. Humanitar ehtiyacların sürətlə artdığı bir vaxtda beynəlxalq əməkdaşlığın daha çevik mexanizmlərlə həyata keçirilməsinin vacibliyi vurğulanır. Zəlzələnin nəticələrinin aradan qaldırılması üçün genişmiqyaslı beynəlxalq dəstək davam edir. Ekspertlər hesab edirlər ki, humanitar yardımın siyasi məsələlərdən kənarda saxlanılması zərərçəkən əhali üçün həyati əhəmiyyət daşıyır.

ABŞ Prezidenti Donald Tramp İranın aparılan danışıqlarda böyük güzəştlər etdiyini bildirib. O qeyd edib ki, ABŞ hazırda prosesdə çox böyük fərqlə irəlidədir və ümumi gedişatı müsbət qiymətləndirib. Trampın sözlərinə görə, İran tərəfinin mövqeyində müəyyən yumşalmalar və irəliləyişlər müşahidə olunur. O, bu danışıqların ümumilikdə çox yaxşı getdiyini vurğulayıb, lakin hansı sahələrdə güzəştlərin edildiyi barədə açıqlama verməyib. Tramp həmçinin ABŞ Senatına səfəri öncəsi jurnalistlərə qısa və ümumi xarakterli bəyanatla çıxış edib və prosesin detalları barədə əlavə məlumat paylaşmayıb.

ABŞ Dövlət katibi Marko Rubio İranın razılaşma çərçivəsində öhdəliklərə əməl etməli olduğunu bildirib. O, 60 günlük sanksiya güzəştinin müvəqqəti olduğunu deyib. Rubiyo öhdəliklər yerinə yetirilməzsə, sanksiyaların bərpa oluna biləcəyini qeyd edib. ABŞ İranın İsveçrədə əldə etdiyi razılaşmaya sadiq qalmasını gözləyir.

İsrail naziri Miki Zohar ABŞ-ın İranla razılaşması səbəbilə iki ölkə arasında gərginliyin artacağını bildirib. O, Vaşinqtonun Tehranla yanaşmasını tənqid edərək İsrailin milli təhlükəsizliyini ön plana çəkdiyini deyib. Nazir ABŞ-la “toqquşma kursu” ehtimalından danışıb. O, İranla razılaşmanın nüvə problemini həll etməyəcəyini də vurğulayıb. Açıqlamalar İsrail–ABŞ münasibətlərində narahatlıqlar fonunda verilib.

ABŞ Prezidenti Donald Tramp İranın Hörmüz boğazında gəmilərdən heç bir rüsum tələb etmədiyini ABŞ-a bildirdiyini açıqlayıb. O, bu məlumatın yanlış olması halında danışıqların dayandırılacağını deyib. Tramp ABŞ-ın İran vəsaitləri üzərində nəzarət saxladığını və onların ərzaq alışına yönəldiləcəyini bildirib. O, İranın ərzaq ehtiyaclarının ABŞ vasitəsilə təmin ediləcəyini qeyd edib. Açıqlama Hörmüz gərginliyi fonunda verilib.

ABŞ Prezidenti Donald Tramp silah istehsalını artırmaq üçün müdafiə sənayesi rəhbərləri ilə Ağ Evdə görüşəcək. Görüş ABŞ-ın İran müharibəsi və digər münaqişələrdən sonra silah ehtiyatlarının azalması fonunda keçirilir. Məlumata görə, ABŞ müttəfiqlərinə böyük həcmdə silah göndərib və bu, ehtiyatlarda azalmaya səbəb olub. Müdafiə sənayesi şirkətləri ilə istehsalın sürətləndirilməsi müzakirə ediləcək. Ağ Evdə bu, ikinci genişmiqyaslı görüşdür.

ABŞ Dövlət katibi Marko Rubio BƏƏ Prezidenti Məhəmməd bin Zayed ilə görüşərək ABŞ-ın BƏƏ-nin təhlükəsizliyinə sadiqliyini bir daha təsdiqləyib. Görüşdə ABŞ–İran memorandumu və Hörmüz boğazından təhlükəsiz keçid məsələləri müzakirə olunub. Tərəflər regionda sülh və sabitliyin vacibliyini vurğulayıblar. Rubionun sözçüsü danışıqların strateji təhlükəsizlik mövzularını əhatə etdiyini bildirib. Səfər Körfəz turunun ilk mərhələsi kimi qiymətləndirilir.