Ukrayna Prezidenti Volodimir Zelenski bildirib ki, Rusiya ilə müharibənin dayandırılmasına dair müzakirə olunan sülh çərçivəsinin layihəsində Ukrayna üçün 15 il müddətinə ABŞ təhlükəsizlik zəmanətləri yer alır. Zelenski bu barədə jurnalistlərə “WhatsApp” qrup söhbəti vasitəsilə açıqlama verib. Onun sözlərinə görə, o, ABŞ Prezidenti Donald Trump ilə görüşündə təhlükəsizlik zəmanətlərinin daha uzunmüddətli — 30, 40, hətta 50 il — olması imkanını qaldırıb. Zelenski qeyd edib ki, Tramp bu təklifi nəzərdən keçirəcəyini bildirib.

ABŞ və İsrail tərəfindən İranın raket və nüvə imkanlarını yenidən bərpa etməsi ilə bağlı xəbərdarlıqlar güclənir. Təhlükəsizlik qiymətləndirmələrinə görə, iyun müharibəsi zamanı İran obyektlərinə endirilən zərbələr təhlükəni tam aradan qaldırmayıb. Vaşinqton Tehran tərəfinin Fordo obyektinin bombalanmasından sonra “mesajı tam dərk etmədiyini” bildirərkən, Təl-Əviv zamanın daraldığını, hərbi variantların yenidən gündəmə gəldiyini və yanlış hesablamaların istənilmədən yeni toqquşmaya yol aça biləcəyini vurğulayır.

ABŞ, Qətər, Misir və Türkiyə Qəzzada atəşkəsin tərəflərini öhdəliklərinə əməl etməyə və təmkin nümayiş etdirməyə çağırıblar. Bu barədə ABŞ-ın xüsusi nümayəndəsi Stiv Uitkoff Mayamidə aparılan danışıqlardan sonra məlumat verib. ABŞ Prezidenti Donald Trampın xüsusi nümayəndəsi olan Uitkoffla adıçəkilən ölkələrin rəsmiləri 10 oktyabrda qüvvəyə minmiş atəşkəsin birinci mərhələsini nəzərdən keçirmək üçün görüşüblər.

İordaniya ABŞ-ın rəhbərlik etdiyi koalisiya çərçivəsində Suriyada İŞİD mövqelərinə qarşı keçirilən hərbi əməliyyatda iştirak etdiyini açıqlayıb. İordaniya Kral Hərbi Hava Qüvvələrinin cümə günü baş tutan zərbələrə cəlb olunduğu bildirilib. ABŞ ordusunun məlumatına görə, əməliyyat Suriyanın mərkəzi bölgələrində İŞİD-in dayaq məntəqələrinə yönəlib və ABŞ hərbçilərinə qarşı edilən hücuma cavab xarakteri daşıyıb.

ABŞ, Qətər, Türkiyə və Misir rəsmiləri Qəzzada atəşkəs razılaşmasının növbəti mərhələsini müzakirə etmək üçün cümə günü Mayamidə bir araya gələcək. Məlumata görə, ABŞ prezidenti Donald Trampın xüsusi elçisi Stiv Vitkoff Qətər, Misir və Türkiyənin yüksək səviyyəli nümayəndələri ilə danışıqlar aparacaq. Türkiyəni görüşdə xarici işlər naziri Hakan Fidan təmsil edəcək. Qətərdən baş nazir Məhəmməd bin Əbdülrəhman Al-Tani, Misirdən isə xarici işlər naziri Bədr Əbdülati iştirak edəcək.