Bakı,AzerVoice

Keçmiş UFC çempionu, irlandiyalı döyüşçü Konor Makqreqor, Bare Knuckle Fighting Championship (BKFC) təşkilatına qarışıq döyüş sənətləri əfsanəsi Fedor Yemelyanenkonu dəvət edib.

AzerVoice xəbər verir ki, İtaliyada keçirilən BKFC mətbuat konfransında UFC döyüşçüsü olan Makqreqor, rusiyalı sambo ustası Fedor Yemelyanenkonun təşkilata qoşulub-qoşulmayacağı ilə bağlı suala cavab verib.

İrlandiyalı döyüşçü müsbət cavab verərək BKFC-nin keçmiş, indiki və gələcək ən güclü döyüşçüləri heyətinə qatdığını bildirib.

"Fedor Yemelyanenko? Yenilikləri izləyin, ola bilər ki, biz Fyodorla bağlı bir elan edək" – deyə Makqreqor bildirib.

Fedor Yemelyanenko qarışıq döyüş sənətlərinin tarixində ən böyük döyüşçülərdən biri hesab olunur. O, bu idman növünün inkişafında mühüm rol oynayıb və Pride, The Rings, Bellator, Strikeforce və digər nüfuzlu təşkilatlarda döyüşüb.

Fedor son döyüşünü 4 fevral 2023-cü ildə Bellator 290 turnirində keçirib. O, titul uğrunda amerikalı çempion Rayan Beyder ilə qarşılaşıb. Görüşdə Rayan Beyder texniki nokautla qalib gəlib.

Bu məğlubiyyətdən sonra Fedor Yemelyanenko idman karyerasını başa vurduğunu elan edib.