BAKI, AzerVoice
MÜSİAD Azərbaycan İstehsalat və Ticarət, Təşkilatlanma və Üzvlərlə Əlaqələr Komissiyalarının birgə təşkilatçılığı ilə Zivella şourumunda “MÜSİAD Azərbaycan üzvlərinin II #BirVəBərabər” adlı networking görüşü keçirilib.
AzerVoice xəbər verir ki, görüşdə MÜSİAD Azərbaycan İdarə Heyətinin sədri Rəşad Cabirli iştirakçıları salamlayaraq, onları tədbirdə görməkdən məmnunluğunu ifadə edib. Çıxışı zamanı təşkilatın ümumi fəaliyyəti, həyata keçirilən mühüm layihələr və qarşıya qoyulan strateji hədəflər barədə ətraflı məlumat vermiş, eyni zamanda MÜSİAD Azərbaycan strukturu çərçivəsində yeni bir təşəbbüs olaraq qadın sahibkarların dəstəklənməsi və onların təşkilat daxilində daha fəal şəkildə təmsil olunması məqsədilə MÜSİAD Azərbaycan Qadın qolunun əsasının qoyulduğunu diqqətə çatdırıb.
Görüşə ev sahibliyi edən, MÜSİAD Azərbaycan İdarə Heyətinin üzvü və Zivellanın Azərbaycandakı direktoru Fatih Uzun çıxışında bu cür tədbirlərin iş adamları arasında əlaqələrin genişlənməsi, yeni əməkdaşlıqların qurulması və qarşılıqlı təcrübə mübadiləsi baxımından əhəmiyyətini vurğulayıb.
Daha sonra MÜSİAD Azərbaycan ailəsinə yeni qoşulmuş Glovent.az, Çiftlik MMC və MG Transport MMC şirkətlərin nümayəndələri iştirakçılara özləri və təmsil etdikləri şirkətlərin fəaliyyət istiqamətləri barədə məlumat veriblər.
Sonda, MÜSİAD Azərbaycan Təhsil və Mədəniyyət Komissiyasının təşkilatçılığı ilə, MÜSİAD-ın yaradılmasının 35 illiyi münasibətilə bu ilin iyun ayında keçiriləcək futbol turnirinin püşkatma mərasimi baş tutub.
Tədbirin rəsmi hissəsi başa çatdıqdan sonra iştirakçılar arasında qarşılıqlı tanışlıq, fikir mübadiləsi və yeni əməkdaşlıq imkanlarının müzakirə olunduğu networking görüşləri həyata keçirilib.
