Bakı,AzerVoice

Qırğızıstanın xarici işlər naziri Jeenbek Kulubayev rəsmi səfəri çərçivəsində Küveytin xarici işlər naziri Abdullah Əli Əl-Yəhya ilə görüşüb

AzerVoice xəbər verir ki, tərəflər ikitərəfli əməkdaşlığın yüksək potensialını qeyd edərək, Qırğızıstan-Küveyt münasibətlərini yeni səviyyəyə çıxarmaq istəklərini bildiriblər.

Danışıqlarda siyasi, ticarət-iqtisadi, mədəni-humanitar əməkdaşlıq, o cümlədən beynəlxalq təşkilatlar çərçivəsində qarşılıqlı fəaliyyət məsələləri müzakirə olunub.

Bundan əlavə, tərəflər qarşılıqlı maraq doğuran regional və beynəlxalq məsələlər ətrafında fikir mübadiləsi aparıblar.

Öz növbəsində Abdullah Əli Əl-Yəhya Küveytin ikitərəfli münasibətlərin dərinləşməsində maraqlı olduğunu təsdiqləyib və dövlət qurumları ilə özəl sektor arasında yeni əməkdaşlıq mexanizmlərinin yaradılması təşəbbüsünü dəstəkləyib.

Görüşün sonunda Jeenbek Kulubayev küveytli həmkarını Qırğızıstana rəsmi səfərə dəvət edib. Abdullah Əli Əl-Yəhya dəvəti qəbul edib və yaxın vaxtlarda Qırğızıstana səfər etməyə hazır olduğunu bildirib.

Danışıqlar nəticəsində iki əsas saziş imzalanıb:

1) Qırğızıstan Nazirlər Kabineti və Küveyt Hökuməti arasında əməkdaşlıq üzrə birgə komissiyanın yaradılması haqqında Anlaşma Memorandumu.

2) Qırğızıstan Xarici İşlər Nazirliyinin Diplomatik Akademiyası ilə Küveyt Xarici İşlər Nazirliyinin Diplomatik İnstitutu arasında Anlaşma Memorandumu.