BAKI, VOA, Orxan Qədirzadə
Beynəlxalq Ana Dili Günü münasibətilə Kanada Azərbaycan Evində xüsusi görüş təşkil olunub.
VOA xəbər verir ki, tədbirdə Kanada Parlamentinin üzvü və Xarici İşlər Nazirinin Parlament katibi Rob Oliphant iştirak edib.
Görüş zamanı ana dilinin qorunması, mədəni kimliyin yaşadılması və gənclərin Kanada cəmiyyətində fəal vətəndaş kimi iştirakının təşviqi məsələləri ətrafında fikir mübadiləsi aparılıb.
Tədbirdə vurğulanıb ki, ana dilinin inkişafı və qorunması milli-mədəni dəyərlərin saxlanılması baxımından mühüm əhəmiyyət daşıyır. Eyni zamanda, diaspor gənclərinin yaşadıqları ölkənin ictimai həyatında aktiv iştirakı və inteqrasiyası məsələləri də diqqət mərkəzində olub.
Kanada Azərbaycan Evi Rob Oliphant-a icmaya göstərdiyi diqqətə və gənclərlə səmimi dialoqa görə təşəkkürünü bildirib.
