BAKI, AzerVoice

İsrailin martın 2-dən humanitar yardım üçün sərhəd qapılarını tamamilə bağlaması Qəzza zolağında aclıq təhlükəsini artırıb.

AzerVoice xəbər verir ki, BMT-nin Ümumdünya Ərzaq Proqramı (WFP) tərəfindən dəstəklənən çörək zavodları un və dizel ehtiyatlarının tükənməsi səbəbindən fəaliyyətini dayandırıb. Çörəkxanaların bağlanması WFP-in Qəzzada ərzaq ehtiyatlarının azalması səbəbindən minlərlə fələstinlinin kəskin aclıq və qida çatışmazlığı riski ilə üzləşdiyi barədə xəbərdarlıq etməsindən bir neçə gün sonra baş verib.

Qəzza zolağında fəaliyyət göstərən 25 çörəkbişirmə müəssisəsi, WFP-nin dəstəyi ilə 23-24 orta ölçülü çörəkdən ibarət 2 kiloqramlıq bağlamalar təqdim edirdi. Lakin sərhədlərin bağlı qalması səbəbindən un, şəkər, duz, maya və dizel kimi əsas ehtiyatlar tükənib.

Qeyd edək ki, Qəzzada əhalinin 70 faizi məhz bu çörəkdən istifadə edirdi. Üstəlik, istehsal olunan çörəyin 30 faizi qaçqın düşərgələrində pulsuz paylanırdı.

BMT rəsmiləri xəbərdarlıq edirlər ki, sərhəd qapıları açılmasa, Qəzzada kəskin qida böhranı yaşanacaq. Fələstinli sakinlər isə beynəlxalq ictimaiyyəti və insan haqları təşkilatlarını humanitar fəlakətin qarşısını almaq üçün təcili addımlar atmağa çağırırlar.