Bakı. AzerVoice:

2024-cü ilin sonuna qədər Özbəkistan xarici investorların iştirakı ilə Daşkənd, Kaşkədərya, Buxara, Namanqan və Nəvai vilayətlərində ümumi gücü 2700 MVt olan altı böyük ölçülü günəş elektrik stansiyasını istifadəyə verəcək.

AzerVoice-un məlumatına görə, bu barədə Özbəkistan prezidentinin 2024-cü il fevralın 21-də qəbul etdiyi “Özbəkistan - 2030” Strategiyasının gənclərə və iş dünyasına dəstək ilində həyata keçirilməsi üzrə Dövlət Proqramı haqqında” fərmanında yer alıb.

Bununla yanaşı ölkədə yaşıl iqtisadiyyata keçid üçün əlverişli şəraitin yaradılması və yaşıl enerji resurslarının payının artırılması üçün bir sıra tədbirlər həyata keçiriləcək.

Belə ki, yaşıl enerji sertifikatlarının dövriyyəsi 2024-cü il aprelin 1-dək bazar prinsipləri əsasında təşkil olunacaq.

Bundan əlavə, istixana qazlarının beynəlxalq ticarəti üzrə layihələrin həyata keçirilməsi qaydası təsdiq ediləcək.

İqlim dəyişikliyi sahəsində müasir monitorinq, hesabat və yoxlama sistemi və məlumat bazası 2024-cü il aprelin 1-dən mərhələli şəkildə tətbiq ediləcək.

Bu arada China Shuifa Singyes Energy Holdings Özbəkistanın Daşkənd şəhərində hər birinin gücü 200 MVt olan beş günəş fotoelektrik stansiyası tikməyi planlaşdırır.

Layihənin dəyəri 714 milyon dollar olaraq qiymətləndirilir.