BAKI,VOA, Fərid Mikayılov

Macarıstan Avropa İttifaqının Rusiyaya qarşı 20-ci sanksiyalar paketini dəstəkləmək üçün əsas şərt irəli sürüb.

VOA xəbər verir ki, Macarıstanın xarici işlər naziri Peter Siyarto bildirib ki, “Drujba” neft kəməri ilə neft tranziti bərpa olunmadan Budapeşt yeni sanksiya paketinin qəbuluna imkan verməyəcək.

Nazir sosial şəbəkədə yayımladığı müraciətdə qeyd edib ki, Macarıstan öz enerji təhlükəsizliyi maraqlarını nəzərə almadan qəbul edilən qərarları dəstəkləməyəcək.

Siyarto vurğulayıb ki, “Drujba” kəməri vasitəsilə Macarıstana neft tədarükü bərpa edilməzsə, Budapeşt Avropa İttifaqının 20-ci sanksiya paketinə razılıq verməyəcək.

Onun sözlərinə görə, Brüsselin yeni sanksiya təşəbbüsləri Avropa iqtisadiyyatına mənfi təsir göstərə bilər və alternativ yanaşmalar nəzərdən keçirilmir.

Qeyd edək ki, Avropa İttifaqı çərçivəsində qərarlar üzv ölkələrin razılığı ilə qəbul olunur və Macarıstan daha əvvəl də Ukraynaya ayrılması nəzərdə tutulan 90 milyard avro məbləğində kredit qərarına etiraz etmişdi.

Budapeştin mövqeyi Aİ daxilində sanksiya siyasəti və enerji təhlükəsizliyi ilə bağlı fikir ayrılıqlarını bir daha gündəmə gətirib.