BAKI,AzerVoice
Həsən Şeyx Mahmud İsrailin Afrika Buynuzu regionunda strateji məqsədlər güddüyünü və fələstinlilərin Somalinin ayrılmaq istəyən “Somaliland” bölgəsinə köçürülməsi planları üzərində çalışdığını bildirib.
AzerVoice xəbər verir ki, Somali prezidenti Əl-Cəzirə telekanalına müsahibəsində İsrailin regionda əsas hədəfinin strateji dəniz və su yollarına nəzarət olduğunu vurğulayıb.
Prezident Mahmud hazırda Türkiyə səfərində olduğunu və bu çərçivədə Rəcəb Tayyib Ərdoğan ilə görüşdüyünü bildirib. Onun sözlərinə görə, İsrailin Somalilandı tanıması bölgədə gizli şəkildə aparılan proseslərin açıq mərhələyə keçməsi deməkdir.
Somaliland və İsrailin planları
Somali lideri qeyd edib ki, ayrılıqçı “Somaliland” administrasiyası fələstinlilərin məskunlaşdırılmasına, İsrail hərbi bazasının yaradılmasına və “İbrahim razılaşmaları”na qoşulmağa razılıq verib.
“İsrailin Somalilanda yaxınlaşması heç bir halda sülh məqsədi daşımır. Bu, əvvəllər gizli şəkildə mövcud olan İsrail varlığının indi açıq şəkildə legitimləşdirilməsidir”, – deyə Mahmud vurğulayıb.
O əlavə edib ki, İsrailin Afrika Buynuzu regionu ilə əvvəl heç bir real marağı və əlaqəsi olmayıb və bu addım Somalinin maraqlarına ziddir.
Prezident Mahmud bildirib ki, İsrailin bu qərarı beynəlxalq ictimaiyyət tərəfindən qınanıb və rədd edilib. Onun sözlərinə görə, bu addım Somalinin uzun illər davam edən daxili problemlərdən çıxmağa çalışdığı həssas dövrdə atılıb.
Somali lideri həmçinin Somaliland ərazisində qeyri-qanuni fəaliyyət göstərən xarici şirkətlərin mövcudluğuna diqqət çəkib.
Mahmud xatırladıb ki, Somaliland 1991-ci ildən etibarən müstəqillik iddiası ilə çıxış etsə də, 30 ildən artıqdır heç bir dövlət tərəfindən tanınmayıb. O, həmçinin Donald Trampın ABŞ-ın bu tanınmanı dəstəkləməyəcəyini açıq şəkildə bəyan etdiyini vurğulayıb.
Qeyd edək ki, Somaliland 1991-ci ildə Somalidən birtərəfli qaydada ayrıldığını elan etsə də, beynəlxalq səviyyədə tanınmır. Somali hökuməti regionu ölkənin ayrılmaz hissəsi hesab edir və Somalilandla birbaşa bağlanan istənilən razılaşmanı Somalinin suverenliyinə və ərazi bütövlüyünə təcavüz kimi qiymətləndirir.