BAKI, AzerVoice

ABŞ-nin qrafik prosessor istehsalçısı "Nvidia" tarixdə ilk dəfə olaraq bazar dəyəri 4 trilyon dolları ötən şirkət olub.

AzerVoice xəbər verir ki, bu barədə "TradingView" platformasında yayımlanan reytinq məlumatlarında qeyd olunub.

Platformanın 9 iyul tarixli ticarət məlumatlarına əsasən, "Nvidia"nın kapitalizasiyası 4 trilyon dollara çatıb. Şirkətin NASDAQ birjasındakı səhmlərinin dəyəri 164,74 dollar təşkil edib ki, bu da gün ərzində 2,34 faiz artım deməkdir. Bununla da "Nvidia" dünya birjalarında liderlik edən ictimai şirkətlər arasında birinci yerə yüksəlib.

Reytinqdə ikinci yerdə qərarlaşan "Microsoft"un kapitalizasiyası 3,73 trilyon dollardır. Onun birja qiyməti isə 502,26 dollar olub.

Məlumat üçün bildirək ki, "Nvidia" ABŞ mənşəli texnologiya şirkətidir və əsasən qrafik prosessorlar və digər çip texnologiyalarının istehsalı ilə tanınır. Şirkət 1993-cü ildə təsis olunub və Kaliforniya ştatının Santa-Klara şəhərində yerləşir. "Nvidia"nın məhsulları süni intellekt, video oyun sənayesi və avtomobil texnologiyaları sahəsində geniş tətbiq olunur.