BAKI, AzerVoice

İspaniya hökuməti ölkədə siqaret çəkməyi daha da məhdudlaşdırmaq məqsədilə bar və restoranların açıq terrasları, məktəb oyun meydançaları və universitet şəhərcikləri də daxil olmaqla bir çox açıq ictimai yerlərdə siqaret qadağasını genişləndirməyi planlaşdırır.

AzerVoice xəbər verir ki, İspaniya Səhiyyə Nazirliyi tərəfindən dəstəklənən yeni qanun layihəsi həm ənənəvi tütün məmulatlarını, həm də elektron siqaretləri əhatə edəcək.

Səhiyyə naziri MoniKa Qarsia “qanun layihəsinin artıq konkretləşdirildiyini” bildirib.

Nazir qeyd edib ki, bu təşəbbüs İspaniyanı “siqaretə qarşı mübarizədə ön cərgəyə” çıxaracaq. Layihənin Nazirlər Kabineti və İspaniya parlamentinin aşağı palatasında müzakirəyə təqdim olunması nəzərdə tutulur.

Tütünə qarşı mübarizə tədbirləri yalnız açıq məkanlarda siqaret çəkmənin qadağan edilməsi ilə məhdudlaşmayacaq. Hökumət eyni zamanda siqareti tərgitmək istəyən şəxslər üçün dəstəyin artırılması və tütün məhsullarına vergi artımı tətbiq edilməsi kimi tədbirlər üzərində də işləyir.

Yeni qadağa layihəsinə əsasən, məktəb oyun meydançaları, universitet şəhərcikləri, dövlət nəqliyyat dayanacaqları, açıq hava bayram tədbirləri və dövlət nəqliyyat vasitələri də siqaret çəkmək üçün qadağan olunmuş ərazilər sırasına daxil ediləcək.

Qeyd edək ki, İspaniyanın solçu koalisiya hökuməti bu təşəbbüsü Avropa Komissiyasının siqaret qadağasının daha geniş ictimai sahələrə şamil edilməsi və elektron siqaretlərin də qadağaya daxil edilməsi ilə bağlı təklifindən sonra hazırlayıb.