Bakı, VOA
Dünyada beş milyard insan şiddətli istilərin təsirinə məruz qalıb.
VOA xəbər verir ki, iqlim dəyişikliyinin yaratdığı şiddətli isti dalğası 16-24 iyun tarixləri arasında dünyanın müxtəlif yerlərində təxminən beş milyard insana təsir edib.
Beynəlxalq tədqiqat təşkilatı Climate Central alimlərinin təhlilinə əsasən, dünya əhalisinin 60 faizindən çoxu bu ayın ortasından etibarən iqlim dəyişikliyi nəticəsində ən azı üç dəfə daha çox olan şiddətli istilərə məruz qalıb.
Neft, qaz və kömürün yanması nəticəsində yaranan emissiyanın yaratdığı iqlim dəyişikliyi səbəbindən 16-24 iyun tarixləri arasında Hindistanda 619 milyon, Çində isə 579 milyon insan şiddətli isti havadan əziyyət çəkib.
İndoneziyada 231 milyon, Nigeriyada 206 milyon, Braziliyada 176 milyon, Banqladeşdə 171 milyon və ABŞ-da 165 milyon insan şiddətli isti havadan təsirlənib həmçinin, Avropada 152 milyon, Meksikada 123 milyon, Efiopiyada 121 milyon insan və Misirdə isə 103 milyon insan anormal istilərə məruz qalıb.
Bildirilib ki, Çində 50 dərəcəyə çatan şiddətli temperaturdan sonra Vuhan şəhəri kondisionerdən istifadə nəticəsində yaranan əlavə elektrik tələbatını qarşılamaq üçün elektrik enerjisinə günlük norma qoymağa başlaya bilər.
Həddindən artıq istilər nəticəsində Misirdə elektrik enerjisinə tələbatın artması elektrik enerjisinin müvəqqəti və planlı kəsilməsinə səbəb olub.
Birləşmiş Millətlər Təşkilatının iqlim elmləri qrumu olan IPCC-nin məlumatına görə, insan fəaliyyəti nəticəsində yaranan qlobal istiləşmə səbəbindən hər 50 ildən bir baş verən həddindən artıq isti dalğaları indi demək olar ki, 5 dəfə daha intensiv müşahidə edilir.
Fransa Milli Elmi Tədqiqatlar Mərkəzinin (CNRS) tədqiqatçısı Davide Faranda, "Builki Həcc zamanı yaşanan ölümcül istilər birbaşa fosil yanacaqların yandırılması ilə bağlıdır və ən müdafiəsiz zəvvarlara təsir edib" - deyə qeyd edib.
Yaxın Şərq vətəndaşlarının və zəvvarların sağlamlığını və təhlükəsizliyini qorumaq üçün təcili tədbirlərin görülməsinin vacib olduğunu vurğulayan Faranda, "Yalnız fosil yanacaqdan istifadənin azaldılması kritik temperatur həddinə çatmağın qarşısını ala bilər və bu mühüm dini ziyarətlərin təkrarlanan faciələrə çevrilməsinin qarşısını ala bilər. " deyə o əlavə edib.
