BAKI,VOA Orxan Qədirzadə

Almaniyanın sabiq kansleri Angela Merkel Berlində yerləşən Bode Muzeyində onun üçün hazırlanmış rəsmi portretin təqdimat mərasimində iştirak edib. Fransa-Almaniya rəssamı Jeremi Keyrasın müəllifi olduğu əsərin açılışı ilə Merkelin portreti Almaniya kanslerlərinin rəsmi portretləri sırasına daxil edilib və gələcəkdə Kansler Aparatının binasında əvvəlki kanslerlərin portretləri ilə birlikdə nümayiş olunacaq.

Portretin təqdimatı Merkelin siyasi fəaliyyətinin yenidən geniş müzakirə olunduğu dövrə təsadüf edir. Sabiq kansler Rusiyaya qarşı uzun illər yumşaq siyasət yürütməkdə, həmçinin miqrasiya böhranı zamanı tətbiq etdiyi "açıq qapı" siyasəti səbəbindən ölkədə siyasi və ictimai gərginliyin yaranmasına şərait yaratmaqda ittiham olunur.

Angela Merkel Almaniyaya 16 il rəhbərlik edib və bu müddət ərzində sakit, təmkinli və rasional idarəçilik üslubu ilə tanınıb.

Portretdə Merkel onun siyasi fəaliyyətinin simvollarından birinə çevrilmiş məşhur pencəklərindən birini geyinmiş vəziyyətdə təsvir olunub.

Məlumata görə, rəssam Jeremi Keyras bu əsəri hazırlamaq üçün aylarla Merkelin qarşısında işləyib. Portret Berlində bu məqsədlə xüsusi ayrılmış emalatxanada ərsəyə gətirilib.

Angela Merkel ötən həftə verdiyi açıqlamada bu proseslə bağlı maraqlı fikirlər səsləndirib.

Hazırda 71 yaşı olan sabiq kansler bildirib ki, insanın özünün tədricən tarixin bir hissəsinə çevrildiyini izləməsi olduqca qəribə hissdir.

"Daha sonra isə mən sadəcə orada asılmış bir tablo olacağam", – deyə Angela Merkel qeyd edib.