BAKI,VOA Orxan Qədirzadə

Çində iki keçmiş müdafiə naziri korrupsiya ittihamları ilə ölüm cəzasına məhkum edilib. Rəsmi məlumatlara görə, hökm iki illik icra təxirəsalınması ilə çıxarılıb.

VOA xəbər verir ki, Çinin dövlət xəbər agentliyi “Sinxua”nın yaydığı məlumata əsasən, keçmiş müdafiə nazirləri Vey Fenqxe və Li Şanqfu korrupsiya və rüşvət işlərində təqsirli biliniblər.

Məlumata görə Vey Fenqxe rüşvət almaqda Li Şanqfu isə həm rüşvət verməkdə, həm də almaqda təqsirli bilinib.

Rəsmi qurumlar korrupsiya işləri ilə bağlı maliyyə məbləğlərini açıqlamayıb.

Məhkəmə qərarına əsasən hər iki keçmiş nazir ömürlük siyasi hüquqlardan məhrum edilib, şəxsi əmlakları müsadirə olunub, Çin Kommunist Partiyasından xaric ediliblər.

Onlar 2024-cü ildə “ciddi intizam pozuntuları” ittihamı ilə partiyadan uzaqlaşdırılmışdılar. Çində bu ifadə əsasən korrupsiya ittihamlarını ifadə etmək üçün istifadə olunur.

Ölüm hökmü necə tətbiq olunur?

Çin hüquq sistemində “iki illik təxirə salınmış edam hökmü” adətən birbaşa icra edilmir. Əgər məhkum bu müddətdə yeni cinayət törətməzsə, hökm çox zaman ömürlük həbs və ya şərti azadlıqsız uzunmüddətli həbs cəzası ilə əvəz olunur.

Analitiklər bildirirlər ki, bu qərar Si Cinpin tərəfindən 2012-ci ildən həyata keçirilən genişmiqyaslı korrupsiyaya qarşı kampaniyanın ən sərt addımlarından biri hesab olunur.

Hər iki nazir 2018–2023-cü illərdə müdafiə naziri vəzifəsində çalışıb və Çin ordusuna nəzarət edən Mərkəzi Hərbi Komissiyanın üzvü olub.

Ekspertlərin fikrincə, bu hadisə Pekinin hərbi-siyasi sistem daxilində nəzarəti daha da sərtləşdirdiyini göstərir.