BAKI,VOA, Orxan Qədirzadə

ABŞ Prezidenti Donald Tramp NATO-nun İranla müharibədə Vaşinqtona dəstək verməməsi səbəbindən ölkəsinin Şimali Atlantika Alyansından çıxması məsələsini ciddi şəkildə nəzərdən keçirdiyini bəyan edib.

VOA xəbər verir ki, "The Telegraph" qəzetinə müsahibə verən Tramp, müttəfiqlərini ABŞ və İsrailin apardığı hərbi əməliyyatlarda tək qoymaqda ittiham edib.

Gərginliyin əsas səbəbi Hörmüz boğazının yenidən açılması üçün ABŞ-ın dəniz güclərinin yerləşdirilməsi tələbinin NATO üzvləri tərəfindən geri çevrilməsi olub. Alyansın bu qərarından sonra Tramp NATO-ya qarşı tənqidlərin dozasını ən yüksək həddə çatdırıb.

"NATO artıq sadəcə kağızdan bir pələngdir. Amerika Birləşmiş Ştatlarının bu ittifaqdan çəkilməsi məsələsi hazırda yenidən qiymətləndirmənin belə fövqündədir."- Tramp deyib.

Hörmüz boğazı böhranında tək qaldığını vurğulayan Tramp, Avropa ölkələrinin təhlükəsizlik məsələlərində ABŞ-ın resurslarından istifadə etdiyini, lakin kritik məqamda dəstək vermədiyini bildirib. Bu çıxış İkinci Dünya Müharibəsindən sonra qurulan transatlantik təhlükəsizlik arxitekturasının gələcəyini ciddi sual altına qoyur.

Ağ Ev rəhbərinin bu bəyanatı beynəlxalq birjada və siyasi dairələrdə şok effekti yaradıb. NATO rəsmiləri hələlik mövzu ilə bağlı rəsmi şərh verməsələr də, ekspertlər ABŞ-ın alyansdan çıxmasının qlobal təhlükəsizlik balansını tamamilə dəyişə biləcəyi barədə xəbərdarlıq edirlər.