BAKI, AzerVoice, Orxan Qədirzadə

Danimarka mətbuatı ABŞ Prezidenti Donald Trampın Qrenlandiya ilə bağlı açıqlamalarından sonra 1952-ci ilə aid məxfi hərbi sənədi ictimaiyyətə açıqlayıb. Sənədə əsasən, Danimarka Silahlı Qüvvələri milli ərazilərə yönələn mümkün hücum zamanı rəsmi müharibə elanını və ya siyasi rəhbərliyin ayrıca göstərişini gözləmədən dərhal hərbi cavab vermək səlahiyyətinə malikdir.

AzerVoice-un verdiyi məlumata görə, sənəd İkinci Dünya müharibəsindən sonra Danimarka ordusunun gözlənilməz hücumlar qarşısında hazırlıqsız qalmaması məqsədilə qəbul edilib. Qərarda vurğulanır ki, Danimarka hərbçiləri düşmən tərəfindən əsir götürülmüş və ya fəaliyyət qabiliyyəti məhdudlaşdırılmış şəxslərdən gələn əmrləri icra etməməlidirlər.

Danimarka mediası, o cümlədən “Berlingske”, sənədin ABŞ-ın Qrenlandiyaya mümkün hərbi müdaxiləsi ssenarisini əhatə etdiyini bildirir. Qeyd olunur ki, Qrenlandiya Danimarka Krallığının tərkibində muxtar ərazi statusuna malikdir.

ABŞ Prezidenti Donald Tramp daha əvvəl Qrenlandiyanın strateji əhəmiyyətini vurğulayaraq adada Rusiya və Çinin təsirinin artdığını iddia edib və ABŞ-ın milli təhlükəsizliyi baxımından Qrenlandiyaya ehtiyac olduğunu bildirib. O, həmçinin ABŞ-ın Qrenlandiya üzərində nəzarətinin Qərbin və Avropa təhlükəsizliyinin maraqlarına uyğun olacağını qeyd edib.

Bununla belə, Danimarkaya bağlı muxtar bölgə olan Qrenlandiya hakimiyyəti ABŞ tərəfindən səsləndirilən, suverenliyin ötürülməsini ehtiva edən təklifləri qəti şəkildə rədd edib.