BAKI, AzerVoice

Dünyanın ən kasıb və beynəlxalq ictimaiyyət tərəfindən tanınmayan regionlarından biri olan Somalilend, ABŞ-ın keçmiş prezidenti Donald Trampa Qırmızı dəniz sahilində hərbi baza yerləşdirməyi təklif edib.

AzerVoice xəbər verir ki, Somalilend Prezidenti Abdirahman Məhəmməd Abdulla ABŞ administrasiyasının diqqətini çəkməyə və ölkəsinin tanınması üçün Vaşinqtonu inandırmağa çalışır.

Bu təşəbbüs, Trampın Afrikaya marağını artırmaq məqsədi ilə həyata keçirilir.

Somalilend həmçinin strateji faydalı qazıntılar sahəsində əməkdaşlıq təklif edib. ABŞ-ın Afrikada Çinlə rəqabət apardığı bir zamanda bu cür təkliflərin Vaşinqton üçün cəlbedici ola biləcəyi vurğulanır.

2024-cü ilin aprelində isə Somalilend ABŞ-a liman və uçuş zolağının icarəyə verilməsini təklif etmiş, bunun əvəzində ölkənin tanınmasını istəmişdi.

Qeyd edək ki, Somalilend 1991-ci ildə Somalidən birtərəfli şəkildə ayrılaraq müstəqilliyini elan etsə də, bu günə qədər heç bir ölkə və ya beynəlxalq təşkilat tərəfindən rəsmi şəkildə tanınmayıb. Regionun ayrıca hökuməti, ordusu və idarəetmə sistemi olsa da, hüquqi baxımdan hələ də Somalinin tərkib hissəsi hesab olunur.