BAKI, AzerVoice

Avropa İttifaqı (Aİ), Brüssel ilə Vaşinqton arasında razılaşma əldə olunmasa, ABŞ məhsullarına qarşı 21 milyard avro dəyərində gömrük rüsumları tətbiq etməyə hazırdır.

AzerVoice xəbər verir ki, bu barədə İtaliyanın xarici işlər naziri və baş nazirin müavini Antonio Tayani məlumat verib.

Tayaninin sözlərinə görə, Böyük Britaniyanın etdiyi kimi prinsipial bir razılaşma əldə etmək olar və sonrakı aylarda ayrı-ayrı ticarət bölmələri üzrə texniki danışıqlara başlamaq mümkündür. O əlavə edib ki, əgər razılaşma əldə olunmazsa, Avropa İttifaqı artıq 21 milyard avro dəyərində gömrük rüsumlarını əhatə edən siyahını hazırlayıb və bu siyahıya əlavə rüsumlar da daxil edilə bilər.

“Əminəm ki, irəliləyiş əldə olunacaq. Gömrük rüsumlarından hər kəs, o cümlədən ABŞ da zərər görür. Əgər fond bazarları çöksə, amerikalıların pensiyaları və əmanətləri təhlükə altında qala bilər. Mən təkrar edirəm: bizim gələcək hədəfimiz sıfır tariflər, Kanada, ABŞ, Meksika və Avropa arasında açıq bazardır” - deyə, Tayani bildirib.

Bundan əvvəl ABŞ Prezidenti Donald Tramp “Truth Social” platformasında Avropa Komissiyası rəhbərinə ünvanladığı məktubu paylaşmışdı. Məktubda qeyd olunurdu ki, avqustun 1-dən etibarən ABŞ, Avropa İttifaqından idxal olunan məhsullara 30 faiz gömrük rüsumu tətbiq edəcək. Bildirilirdi ki, bu yeni tariflər sektor üzrə tətbiq olunan və hazırda 10 faiz təşkil edən rüsumlardan əlavə olacaq.

Avropa Komissiyası isə bəyan edib ki, bu cür rüsumlar Avropa ixracını sarsıdacaq və əsas transatlantik təchizat zəncirlərinə zərbə vuracaq. Komissiyanın mətbuat xidməti tərəfindən yayılan açıqlamada vurğulanıb ki, avqustun 1-ə qədər Avropa İttifaqı ABŞ ilə razılaşma əldə etməyə çalışacaq, eyni zamanda cavab tədbirlərini də hazırlayacaq.