BAKI, AzerVoice

Beynəlxalq Atom Enerjisi Agentliyi (MAQATE) İranın silah səviyyəsinə yaxın 60%-lik zənginləşdirilmiş uran ehtiyatı saxlaması ilə bağlı ciddi narahatlığını ifadə edib.

AzerVoice xəbər verir ki , MAQATE-nin baş direktoru Rafael Qrossi iki ayrı hesabatda bəyan edilməmiş ərazilərdə aşkar edilən uran izləri ilə bağlı Tehranın hələ də izahat vermədiyini vurğulayıb. Məlumata görə, hesabatlardan birində İranın 60% zənginləşdirilmiş uran ehtiyatının 274,4 kiloqram olduğu və bu miqdarın 90%-ə çatdırılacağı təqdirdə altı nüvə bombası hazırlamaq üçün kifayət edəcəyi bildirilib.

"İran yüksək zənginləşdirilmiş uran istehsalını və ehtiyatını artırmağa davam edir ki, bu da ciddi narahatlıq doğurur," – deyə Qrossi bəyan edib.

Bu hesabat, ABŞ prezidenti Donald Trampın Tehrana qarşı "maksimum təzyiq" siyasətinə qayıtmasından sonra MAQATE-nin İranla bağlı ilk qiymətləndirməsidir.

Digər tərəfdən, ABŞ dövlət katibi Marko Rubio İraqın baş naziri Məhəmməd Şia əl-Sudani ilə telefon danışığı aparıb. O, söhbət zamanı "İranın bədxah təsirinin qarşısının alınması" məsələsini müzakirə etdiklərini bildirib.