Bakı, AzerVoice

Kanadanın müdafiə naziri Bill Blair bildirib ki, Ottava ABŞ prezidenti Donald Trampın Dəmir Qübbə sisteminə bənzər raketdən müdafiə qalxanı layihəsinə qoşulmağa hazırdır.

AzerVoice xəbər verir ki, Blair jurnalistlərə açıqlamasında vurğulayıb ki, Kanada NATO və NORAD çərçivəsində Şimali Amerikanın hava müdafiəsində əsas tərəfdaşdır.

“Bütün Şimali Amerika üçün inteqrasiya olunmuş raketdən müdafiə sistemi hamı üçün ən məntiqli seçimdir.” - deyə o bildirib.

Xatırladaq ki, Tramp İsrailin Qəzzada və Livanda istifadə etdiyi "Dəmir Qübbə" sisteminə bənzər raketdən müdafiə sistemi yaratmaq üçün sərəncam imzalayıb.

Müdafiə naziri Pit Heqsətə 60 gün ərzində ballistik, hipersəsli və təkmil qanadlı raketləri tutmaq üçün nəzərdə tutulan "inkişaf etmiş raketdən müdafiə qalxanı" planını hazırlamağı tapşırıb. Layihə kosmosda yerləşən ələ keçirən qurğuların inkişafını da nəzərdə tutur.

Tramp 2024-cü il kampaniyası zamanı prezident seçiləcəyi halda bu sistemin ABŞ versiyasını yaradacağını vəd etmişdi. Lakin layihənin yüksək maliyyə dəyəri ciddi tənqidlərə səbəb olub.

Qeyd edək ki, Kanadanın müdafiə nazirinin bu açıqlamaları, Trampın Kanada mallarına 25% rüsum tətbiq edəcəyi ilə bağlı hədələrindən sonra iki ölkə arasındakı münasibətlərin gərginləşdiyi bir vaxtda səslənib.

Tramp həmçinin Kanadanı “51-ci ştat” adlandırıb və onun ABŞ-ın bir hissəsinə çevrilməsi ilə bağlı müzakirələri gündəmə gətirib.