Bakı, AzerVoice
ABŞ Dövlət Departamenti və ABŞ Beynəlxalq İnkişaf Agentliyi (USAID)
maliyyələşdirilən bütün xarici yardımların dayandırıldığı elan
edib.
AzerVoice xəbər verir ki, Dövlət
Departamentinin açıqlamasına görə, yardım proqramlarının
effektivliyi və ABŞ-ın xarici siyasətinə uyğunluğu
qiymətləndirilmək üçün ödənişlər müvəqqəti olaraq kəsilib.
Bəyanatda, bu qərarın həm mənəvi öhdəlik, həm də Amerika xalqının
maraqlarını qorumaq üçün atıldığı vurğulanıb.
Xatırladaq ki, ABŞ Prezidenti Donald Tramp yanvarın 21-də vəzifəyə başladıqdan dərhal sonra xarici yardımları dayandırmaq üçün fərman imzalamışdı. Bu fərmana əsasən, xarici ölkələrə edilən ödənişlər azaldılacaq və yardım proqramlarının məqsədə uyğunluğu 90 gün ərzində araşdırılacaq.
Qeyd edək ki, Birləşmiş Ştatların xarici inkişaf yardımı proqramı iqtisadi, sosial, texniki və humanitar sahələrdə yardım göstərməyi əhatə edir. Bu yardımların dayandırılması bir çox ölkənin ABŞ-dan aldığı dəstəyi müvəqqəti olaraq itirəcəyi anlamına gəlir.