Bakı,AzerVoice

ABŞ-ın Los-Anceles şəhəri və ətraf bölgələrində günlərdir davam edən meşə yanğınlarını hələ də nəzarət altına almaq mümkün olmayıb.

AzerVoice xəbər verir ki, son rəsmi məlumata görə, təbii fəlakət 40 min hektar ərazini külə çevirib, minlərlə evə ciddi ziyan vurub və 24 nəfər həyatını itirib.

Los-Anceles County Coroner Office ölənlərin sayının artdığını təsdiqləyərək, İton bölgəsində 16 nəfər, Palisadesdə isə 8 nəfərin öldüyünü açıqlayıb.

Rəsmi mənbələrə görə, 16 nəfər hələ də itkin düşmüş hesab edilir və bu rəqəmin artma ehtimalı var. Yanğınların yayılma təhlükəsi səbəbindən təxminən 150 min insan üçün təxliyə əmri verilib. 700-dən çox insan sığınacaqlara yerləşdirilib.

Səlahiyyətlilər, yanğın nəticəsində itkin düşənlər barədə məlumat vermək üçün xüsusi əlaqə mərkəzi yaratdıqlarını bildiriblər. Eyni zamanda, təxliyə edilən sakinlərə evlərinə dəyən ziyanı qiymətləndirə biləcəkləri onlayn məlumat bazası təqdim olunub.

Milli Meteoroloji Xidmət rəsmiləri yanğını gücləndirə biləcək küləklər barədə xəbərdarlıq edib. Yanvarın 15-nə qədər küləyin davam edəcəyi və alovların daha geniş ərazilərə yayıla biləcəyi ehtimal olunur.

Yanğınsöndürmə briqadaları fasiləsiz çalışsa da, güclü külək və quru hava şəraiti yanğını nəzarət altına almağı çətinləşdirir. Səlahiyyətlilər, insanlara təxliyə əmrlərinə ciddi əməl etməyi və təhlükəsiz bölgələrə sığınmağı tövsiyə edib.

Qeyd edək ki, yanvarın 7-də Los-Ancelesdə dəbdəbəli məhəllələrindən birində baş verən yanğınların 6 ayrı sahədə davam etdiyi və hazırda yanğında 24 nəfərin həlak olduğu rəsmilər tərəfindən açıqlanıb. Yanğınların səbəbləri hazırda araşdırılır, lakin rəsmi mənbələr havanın quraq və küləkli şəraitinin alovun sürətlə yayılmasına səbəb olduğunu qeyd edirlər.