BAKI, AzerVoice

Türkiyədə mobil miqrasiya nəzarəti ilə qeyri-qanuni miqrantların aşkarlanma faizi kəskin şəkildə azalıb.

AzerVoice xəbər verir ki, Türkiyənin daxili işlər naziri Ali Yerlikaya mobil miqrasiya nəzarət vasitələrinin tətbiqinin nəticələrini açıqlayıb.

Onun sözlərinə görə, 2023-cü ilin iyulunda tətbiq edilən proqramın ilk 3 ayında qeyri-qanuni miqrantların aşkarlanma faizi 74,5% olduğu halda, bu rəqəm son bir ayda 1,8%-ə düşüb.

Nazir bildirib ki, mobil miqrasiya məntəqələrinin sayı yeni 105 avtomobilin əlavə olunması ilə 375-ə çatdırılıb. Bu vasitələr vasitəsilə indiyədək 4,5 milyondan çox şəxs yoxlanılıb, onlardan 213 min nəfərin qeyri-qanuni miqrant olduğu müəyyən edilib.

Nazir Yerlikaya bu yanaşmanın həm hüquqi, həm də insani əsaslara söykəndiyini vurğulayaraq, Prezident Rəcəb Tayyib Ərdoğanın “qanunsuz miqrasiyaya qarşı mübarizə güzəştə getmədən davam edəcək” sözlərini xatırladıb.

Qeyd edək ki, “səyyar miqrasiya məntəqəsi” tətbiqi ilk dəfə 2023-cü il iyulun 19-da İstanbulda istifadəyə verilib. Miqrasiya İdarəsinin rəhbəri Hüseyn Kök bu tətbiqin qlobal miqrasiya idarəçiliyinə nümunəvi töhfə olduğunu bildirib. Təqdimat mərasimi yeni nəqliyyat vasitələrinin yola salınması ilə başa çatıb.