BAKI,VOA, Orxan Qədirzadə

İsrail rəhbərliyi Livanın cənubunda nəzarət altında saxladığı ərazilərdən geri çəkilməyəcəyini açıqlayıb. İsrailin müdafiə naziri Yisrael Kats bildirib ki, ordunun Livandakı əməliyyatlarına hər hansı məhdudiyyət tətbiq olunmayıb və hərbi fəaliyyət davam etdiriləcək.

Nazirin sözlərinə görə, İsrail ordusunun Livandakı əməliyyatlarının məhdudlaşdırıldığı barədə yayılan məlumatlar həqiqəti əks etdirmir. O iddia edib ki, həyata keçirilən əməliyyatlar Hizbullaha qarşı cavab tədbirləri xarakteri daşıyır.

Yisrael Kats qeyd edib ki, İsrail ordusu Livanın cənubunda yerləşən və "Sarı xətt" adlandırılan ərazidə mövcudluğunu qoruyub saxlayır. Onun sözlərinə görə, İsrail qüvvələri həmin mövqelərdən Livan ərazisinin daha dərin hissələrinə doğru əməliyyatlar həyata keçirməyə davam edir.

Nazir həmçinin bildirib ki, qüvvədə olduğu elan edilən atəşkəs rejimi İsrail ordusunun Livanın cənubundan çıxmasını nəzərdə tutmur.

"Baş nazir Benyamin Netanyahu ilə birlikdə dəfələrlə açıq şəkildə bəyan etmişik ki, İsrail Livandakı təhlükəsizlik zonasından geri çəkilməyəcək", - deyə Kats vurğulayıb.

Xatırladaq ki, İran və ABŞ Pakistanın vasitəçiliyi ilə aparılan danışıqlar çərçivəsində iyunun 14-də müharibənin dayandırılması və mövcud problemlərin diplomatik yollarla həllini nəzərdə tutan 14 maddədən ibarət memorandum üzrə razılığa gəldiklərini elan etmişdilər.

"İslamabad Memorandumu" adlandırılan sənəd iyunun 18-də İran Prezidenti Məsud Pezeşkian və ABŞ Prezidenti Donald Tramp tərəfindən rəqəmsal formada imzalanaraq qüvvəyə minib.

Memorandumun əsas müddəalarından biri Livan da daxil olmaqla bütün cəbhələrdə hərbi əməliyyatların dayandırılmasını nəzərdə tutur. Məhz bu müddəa İsraildə narazılıqla qarşılanıb.

İsrail rəsmiləri sənədin qüvvəyə minməsindən sonra da Livanda nəzarət etdikləri ərazilərdən çıxmayacaqlarını bəyan edib, eyni zamanda İsrail ordusu ölkə ərazisində hərbi əməliyyatlarını davam etdirib.

İsrail hücumlarının intensivləşməsindən sonra iyunun 19-da Livanla yeni atəşkəs rejiminin qüvvəyə mindiyi açıqlansa da, bölgədə silahlı insidentlər və hərbi əməliyyatlar tam dayanmayıb.

Bununla yanaşı, İsrail mətbuatında yayılan məlumatlarda Baş nazir Benyamin Netanyahunun orduya Livanın cənubuna yönəlmiş hücumları dayandırmaq göstərişi verdiyi iddia olunub. Lakin İsrail rəhbərliyinin son açıqlamaları bölgədə hərbi mövcudluğun və əməliyyatların davam etdiriləcəyini göstərir.

Yaxın Şərqdə davam edən gərginlik fonunda Livan məsələsi İran–ABŞ danışıqlarının əsas gündəm mövzularından biri olaraq qalır və tərəflər arasında əldə olunmuş razılaşmaların taleyi regiondakı təhlükəsizlik vəziyyətinə birbaşa təsir göstərə bilər.