BAKI,VOA Orxan Qədirzadə

İraqda yeni hökumətin formalaşdırılması prosesi yekunlaşıb və Baş nazir və kabinet üzvləri parlamentdə keçirilən səsvermə nəticəsində etimad qazanaraq rəsmi şəkildə vəzifəyə başlayıblar.

VOA xəbər verir ki, Əli əz-Zeydi Baş nazir kimi parlamentdən etimad səsi alaraq hökumətə rəhbərlik etməyə başlayıb.

İraq Nümayəndələr Məclisində keçirilən iclasda hökumət proqramı müzakirə edildikdən sonra Baş nazir Əli əz-Zeydi və kabinetdə yer alan 14 nazir namizədinə mütləq səs çoxluğu ilə etimad göstərilib və onlar and içərək vəzifələrinin icrasına başlayıblar.

Parlamentdə keçirilən səsvermənin nəticələrinə əsasən hökumətin əsas postları aşağıdakı kimi təsdiqlənib: neft naziri Bəsim Məhəmməd Xıdır, sənaye naziri Məhəmməd Nuri Əhməd, elektrik enerjisi naziri Əli Səad Vəhib, səhiyyə naziri Əbdülhüseyn Əziz, ətraf mühit naziri Sərvə Əbdülvahid, kənd təsərrüfatı naziri Əbdürrəhim Casım, su ehtiyatları naziri Müsənna Əli Mehdi, ticarət naziri Mustafa Nizar Cümə, ədliyyə naziri Xalid Şəvani, təhsil naziri Əbdülkərim Abtan, nəqliyyat naziri Vəhəb Selman Məhəmməd, xarici işlər naziri Fuad Hüseyn, maliyyə naziri Əli Falih Sari və rabitə naziri Mustafa Sened olub.

Kabinet ümumilikdə iyirmi üç nazirlikdən ibarət olsa da, səsvermə nəticəsində yalnız on dörd nazir etimad qazanıb. Daxili işlər, planlaşdırma, tikinti və mənzil, mədəniyyət və turizm, həmçinin ali təhsil və elmi araşdırmalar nazirliklərinə namizədlər etimad səsi ala bilməyib.

Həmçinin əmək və sosial təminat, gənclər və idman, miqrasiya və köçkünlər, eləcə də müdafiə nazirliyi üzrə namizədlər parlamentə ümumiyyətlə təqdim olunmayıb. Bu səbəbdən həmin portfellərlə bağlı məsələlərin gələcək iclaslarda yenidən müzakirə ediləcəyi bildirilib.

İraq hökumətinin tam tərkibinin formalaşdırılması üçün parlamentin növbəti dövrdə əlavə iclaslar keçirməsi gözlənilir.

Türkiyə Xarici İşlər Nazirliyi isə İraqda yeni hökumətin formalaşması və Baş nazir Əli əz-Zeydinin etimad qazanaraq vəzifəyə başlamasını müsbət qiymətləndirib. Nazirliyin açıqlamasında bu siyasi prosesdən məmnunluq ifadə olunub və yeni hökumətə fəaliyyətində uğurlar arzulanıb.

Açıqlamada vurğulanıb ki, regionun həssas dövrdən keçdiyi bir vaxtda İraqın sabitliyi, rifahı və regional inteqrasiyası istiqamətində atacağı addımlar mühüm əhəmiyyət daşıyır və Türkiyə İraqın bu istiqamətdəki səylərini dəstəkləməyə davam edəcək.