BAKI,VOA Orxan Qədirzadə

ABŞ mərkəzli araşdırma şirkətlərinin hazırladığı son hesabatlarda 1979-cu ildən bu yana yəhudi əleyhdarlığının ən yüksək səviyyəyə çatdığı bildirilib. Hesabatlarda xüsusilə sosial mediada həm yəhudi, həm də İsrail əleyhinə ritorikanın daha geniş yayılmağa başladığı qeyd olunub.

Anti-Defamation League tərəfindən açıqlanan məlumatlarda yəhudi və İsrail əleyhdarı çağırışların ictimai müzakirələrdə daha görünən hala gəldiyi, sosial şəbəkələrdə isə müəyyən mənada normallaşdığı vurğulanıb.

VOA xəbər verir ki, bu fonda Benyamin Netanyahu ABŞ-də artan İsrail əleyhdarlığına münasibət bildirərək bunun arxasında xarici təsirlərin dayandığını iddia edib. Netanyahu xüsusilə Pakistanı ittiham edərək sosial mediada saxta hesablar və avtomatlaşdırılmış şəbəkələr vasitəsilə ictimai rəyin manipulyasiya edildiyini irəli sürüb.

Onun sözlərinə görə, bəzi ölkələr sosial media platformalarında saxta profillər və “bot şəbəkələri” vasitəsilə ABŞ ictimaiyyətində İsrailə dəstəyin zəiflədilməsi istiqamətində fəaliyyət göstərirlər. Netanyahu bildirib ki, məqsəd ABŞ–İsrail münasibətlərini zəiflətməkdir.

İsrail baş naziri çıxışında belə bir nümunə də səsləndirib: sosial şəbəkələrdə özünü “Texaslı amerikalı” kimi təqdim edən bəzi istifadəçilərin İsrailə dəstəkdən imtina etdiklərini yazdıqlarını, lakin həmin hesabların izlənməsi zamanı onların Pakistan mənşəli olduğu iddiasını irəli sürüb.

Son aylarda İsrailin Qəzza zolağında həyata keçirdiyi hərbi əməliyyatlar və bölgədə artan gərginlik səbəbindən dünyanın müxtəlif ölkələrində İsrail əleyhinə etiraz aksiyaları genişlənib. Beynəlxalq insan haqları təşkilatları və bir sıra dövlətlər Qəzzadakı humanitar vəziyyətlə bağlı ciddi narahatlıqlar ifadə edirlər.

Eyni zamanda Şərqi Aralıq dənizi bölgəsində İsrailin Yunanıstan və Kiprin yunan icması ilə əməkdaşlığı da regional siyasi müzakirələrin əsas mövzularından biri olaraq qalır.