BAKI,VOA Orxan Qədirzadə
HƏMAS Siyasi Bürosunun rəhbərlərindən biri olan Xəlil əl-Həyyənin oğlu Əzzam əl-Həyyə İsrailin Qəzza şəhərinə endirdiyi hava zərbəsi nəticəsində həyatını itirib.
VOA xəbər verir ki, Əzzam əl-Həyyə Qəzza şəhərinin Əd-Dərəc məhəlləsinə təşkil edilən hücum zamanı ağır yaralanıb və daha sonra aldığı xəsarətlərdən ölüb. Bu gün Qəzza şəhərində onun dəfn mərasimi keçirilib.
Beləliklə, Xəlil əl-Həyyənin müxtəlif illərdə İsrail hücumları nəticəsində həyatını itirən oğullarının sayı dördə çatıb. Daha əvvəl onun oğulları Həmzə, Usamə və Həmmam əl-Həyyə də ayrı-ayrı hücumlarda ölüb.
Məlumata əsasən, Həmzə əl-Həyyə 2008-ci ildə İsrail pilotsuz uçuş aparatının zərbəsi nəticəsində, Usamə əl-Həyyə isə 2014-cü ildə ailə üzvləri ilə birlikdə İsrail bombardmanı zamanı həyatını itirib. Həmmam əl-Həyyə isə 2025-ci ildə Dohada yerləşən danışıqlar nümayəndəliyinə təşkil edilən hücum zamanı ölüb.
Oğlunun öldürülməsindən sonra açıqlama verən Xəlil əl-Həyyə bildirib ki, İsrailin bu hücumları HƏMAS nümayəndə heyətinə təzyiq göstərmək məqsədi daşıyır.
Onun sözlərinə görə, İsrail siyasi güzəştlər əldə etmək üçün lider ailələrini hədəfə alır, lakin bu hücumlar onların mövqeyini dəyişməyəcək.
Əl-Həyyə qeyd edib ki, “övladlarımızın öldürülməsi bizi qorxutmayacaq” və ailəsinin verdiyi itkilər Fələstin xalqının yaşadığı ağrıların bir hissəsidir.
Hadisə HƏMAS ilə İsrail arasında vasitəçilər üzərindən davam edən danışıqların həssas mərhələsində baş verib. Siyasi müşahidəçilər hesab edirlər ki, bu cür hücumlar danışıqlar prosesinə psixoloji və siyasi təzyiq məqsədi daşıya bilər.
HƏMAS isə yaydığı bəyanatda Əzzam əl-Həyyənin öldürülməsini “qorxaq cinayət” adlandıraraq bildirib ki, lider ailələrinin və mülki şəxslərin hədəfə alınması təşkilatın mövqeyini dəyişdirməyəcək.
Son aylarda Qəzza zolağında vəziyyət daha da ağırlaşıb. İsrailin davam edən hava hücumları nəticəsində bölgədə humanitar böhran dərinləşib, mülki itkilərin sayı artıb və atəşkəs danışıqları ətrafında gərginlik yüksəlib. Vasitəçilərin diplomatik səylərinə baxmayaraq, tərəflər arasında yekun razılaşmanın əldə olunması hələ də mümkün olmayıb.