BAKI,VOA, Orxan Qədirzadə

Suriya maliyyə sabitliyini gücləndirmək məqsədilə yeni valyuta və qızıl bazarının yaradılacağını açıqlayıb.

VOA xəbər verir ki, Suriya Mərkəzi Bankının rəhbəri Əbdülqadir Hüseyrinin sözlərinə görə, Dəməşqdə xarici valyuta və qızıl üzrə tənzimlənən elektron ticarət platforması yaradılacaq.

Məlumata görə, bu təşəbbüs ölkədə monetar siyasətin gücləndirilməsi və maliyyə sistemində şəffaflığın artırılması strategiyasının bir hissəsidir.

Rəsmi açıqlamada bildirilib ki, yeni bazar beynəlxalq standartlara uyğun şəkildə fəaliyyət göstərəcək və qiymətlərin vahid formada müəyyənləşdirilməsinə imkan yaradacaq.

Qeyd olunub ki, bu addım qeyri-rəsmi bazarların təsirini azaltmaq və spekulyativ əməliyyatların qarşısını almaq məqsədi daşıyır.

Mərkəzi Bank rəhbəri vurğulayıb ki, platforma bazar iştirakçıları üçün etibarlı məlumat təmin edəcək və tələb-təklif balansını daha şəffaf şəkildə əks etdirəcək.

Ekspertlər bildirir ki, bu təşəbbüs uzun illər davam edən münaqişədən sonra zəifləmiş maliyyə sisteminin bərpasına yönəlib.

Beynəlxalq maliyyə institutlarının hesabatlarına görə, ölkədə fiskal imkanların məhdudluğu və institusional parçalanma iqtisadi sabitliyə mənfi təsir göstərməkdə davam edir.

Bununla yanaşı, Suriyada valyuta islahatlarının da həyata keçirildiyi, köhnə pul nişanlarının dövriyyədən çıxarılması və yenilənmiş valyutanın tətbiqinə başlanıldığı qeyd olunur.

Analitiklər hesab edir ki, yeni bazarın yaradılması iqtisadi bərpa prosesində mühüm mərhələ olsa da, onun effektivliyi siyasi və iqtisadi islahatların davamlılığından asılı olacaq.