BAKI, VOA, Nailə Babazadə

Birləşmiş Ərəb Əmirlikləri (BƏƏ) İrandan atılan ballistik raket və pilotsuz uçuş aparatlarının (PUA) ölkənin hava hücumundan müdafiə sistemləri tərəfindən uğurla dəf edildiyini açıqlayıb.

VOA xəbər verir ki, BƏƏ Müdafiə Nazirliyinin yaydığı yazılı bəyanatda bildirilir ki, ölkənin müxtəlif bölgələrində eşidilən partlayış səsləri hava hücumundan müdafiə bölmələri və qırıcı təyyarələrin müdaxiləsi nəticəsində təhdidlərin havada məhv edilməsindən qaynaqlanıb. Nazirlik bütün müdafiə vahidlərinin İran mənbəli hücumlara qarşı tam hazırlıq və yüksək teyakkuz vəziyyətində olduğunu vurğulayıb.

Bu gərginlik fevralın 28-dən etibarən ABŞ və İsrailin İrana qarşı başlatdığı genişmiqyaslı hərbi əməliyyatların davamı kimi qiymətləndirilir. Belə ki, Vaşinqton və Tehran arasında nüvə müzakirələrinin davam etdiyi bir vaxtda başlayan hücumlar bölgədə müharibə alovunu alovlandırıb. İran tərəfi İsrail ilə yanaşı, ABŞ hərbi bazalarının yerləşdiyi BƏƏ, Qətər və Bəhreyn kimi ölkələrdəki hədəfləri raket və dron zərbələri ilə hədəf almaqla cavab verir.

Məlumata görə, ABŞ-İsrail koalisiyasının hücumları nəticəsində İranın ali lideri Ayətullah Əli Xameneyi və bir çox yüksək rütbəli rəsmi həlak olub. İran rəsmilərinin son statistikasına əsasən, bu zərbələr nəticəsində ölənlərin sayı 1348-i keçib, yaralıların sayı isə 17 mini ötüb. BƏƏ rəhbərliyi regional təhlükəsizliyin qorunması üçün beynəlxalq tərəfdaşlarla koordinasiyanı gücləndirdiyini və ölkə daxilində mülki infrastrukturun mühafizəsi üçün bütün tədbirlərin görüldüyünü bəyan edib.