BAKI,VOA, Fərid Mikayılov

İsrailin müdafiə naziri İsrael Katz Hizbullahın hücumlarının davam edəcəyi təqdirdə Livanda hərbi əməliyyatların genişləndirilə biləcəyini bildirib.

VOA xəbər verir ki, İsrail Müdafiə Nazirliyinin məlumatına görə, Katz İsrail ordusunun yüksək rütbəli rəhbərliyi ilə vəziyyətə dair müşavirə keçirib.

Nazir görüşdən sonra açıqlamasında Hizbullahın İsrail ərazisinə kütləvi raket zərbələri endirdiyini iddia edib. Onun sözlərinə görə, buna cavab olaraq İsrail ordusu Livanın paytaxtı Beyrutun Dahiye bölgəsi də daxil olmaqla ölkənin müxtəlif ərazilərində intensiv hücumlar həyata keçirib.

Katz bildirib ki, Livan hakimiyyətinə Hizbullahın İsrailə qarşı hücumlarının qarşısının alınması barədə mesaj göndərilib.

“Hizbullahın İsrailə atəş açmasının qarşısı alınmazsa, biz həmin ərazini ələ keçirərək bunu özümüz edəcəyik” – deyə o bildirib.

Nazirin sözlərinə görə, İsrailin baş naziri Benyamin Netanyahu ilə birlikdə ordunun Livanda həyata keçirdiyi əməliyyatların genişləndirilməsi barədə göstəriş verilib.