BAKI, VOA, Nailə Babazadə
Ərəb ölkələrinin xarici işlər nazirləri bazar günü İranın ərəb dövlətlərinə qarşı həyata keçirdiyi hücumları kəskin şəkildə pisləyərək, bu hərəkətləri "beynəlxalq sülh və təhlükəsizliyə ciddi təhdid" adlandırıblar. Onlar BMT Təhlükəsizlik Şurasını Tehranı bu hücumları dərhal dayandırmağa məcbur etməyə çağırıblar.
VOA xəbər verir ki, Ərəb Dövlətləri Liqası Şurasının nazirlər səviyyəsində keçirilən fövqəladə iclası iddia edilən hücumları müzakirə etmək məqsədilə videokonfrans vasitəsilə baş tutub. Sessiyanın sonunda iştirakçılar "İranın qanunsuz təcavüzlərini" pisləyən və İranı regiondakı müttəfiq silahlı qruplaşmalar və milislərdən istifadə də daxil olmaqla, "düşmən hərbi əməliyyatlarını və qonşu dövlətlərə qarşı bütün təxribat xarakterli hərəkətləri və ya təhdidləri" dərhal dayandırmağa çağıran 16 bəndlik bəyanat yayıblar.
Bəyanatda hədəf alınan ərəb ölkələrinin suverenliyi, ərazi bütövlüyü və müstəqilliyinə "sarsılmaz dəstək" bir daha təsdiqlənib, onların təhlükəsizliyini və sabitliyini qorumaq üçün görülən hər hansı tədbirə tərəfdar olduqları bildirilib. Həmçinin, həmin dövlətlərin hücumlara cavab vermək hüququ tanınıb.
Xarici işlər nazirləri hücumları qəti şəkildə rədd etdiklərini bildirərək, ərəb dövlətləri arasında tam həmrəyliyi vurğulayıblar. Onlar Ərəb Liqasının Nizamnaməsinə və Birgə Ərəb Müdafiəsi və İqtisadi Əməkdaşlıq Müqaviləsinə istinad edərək, üzv dövlətlərin təhlükəsizliyinin bölünməz olduğunu və bir üzvə edilən hücumun hamıya edilmiş sayıldığını xatırladıblar.
Bəyanatda hədəf alınan dövlətlərin BMT Nizamnaməsinin 51-ci maddəsinə uyğun olaraq fərdi və ya kollektiv özünümüdafiə hüququ təsdiq edilib. BMT Təhlükəsizlik Şurası və Baş Assambleyası da daxil olmaqla, beynəlxalq təsisatlar vasitəsilə İranı məsuliyyətə cəlb edəcək qətnamələrin qəbulu üçün fəaliyyətin davam etdiriləcəyi bildirilib.
Nazirlər beynəlxalq hüquq çərçivəsində gəmiçilik azadlığına və kommersiya daşımaları hüquqlarına hörmət edilməsinin zəruriliyini vurğulayıblar. Hörmüz boğazının bağlanması və ya Bab əl-Məndəb boğazında naviqasiyanın pozulması kimi cəhdlərin beynəlxalq dəniz yollarını təhdid etdiyi qeyd olunub. Bu cür addımların Körfəz sabitliyini, qlobal enerji təchizatını və beynəlxalq təhlükəsizliyi təhlükəyə atacağı barədə xəbərdarlıq edilib.
Livanla bağlı bölmədə ölkənin birliyi və suverenliyinə dəstək ifadə olunub. Livan hökumətinin "Hizbullah"ın bütün təhlükəsizlik və hərbi fəaliyyətlərini dərhal qadağan etmək, onları qanunsuz elan etmək və qruplaşmanı yalnız hüquqi çərçivədə siyasi fəaliyyətlə məhdudlaşdırmaq qərarı alqışlanıb. Silahların yalnız Livan dövlətinin və onun qanuni təsisatlarının, xüsusən də Livan Silahlı Qüvvələrinin əlində olması vacibliyi vurğulanıb.
Fələstin məsələsində isə nazirlər nüfuzlu beynəlxalq aktorları "işğalçı güc" olan İsrailə təzyiq göstərməyə çağırıblar ki, 1967-ci ildə ələ keçirilmiş Fələstin və ərəb torpaqlarının qanunsuz işğalına son qoyulsun.
Ərəb Dövlətləri Liqasının Baş katibi Əhməd Əbul Qeyt iclasın ərəb dövlətlərinin suverenlik pozuntularına qarşı "tək bir səslə" danışdığına dair aydın mesaj verdiyini deyib. O, bu hücumları beynəlxalq hüququn pozulması və ümumi ərəb milli təhlükəsizliyinə təhdid kimi xarakterizə edib.
Misirin Xarici işlər naziri Bədr Abdelatti də Körfəz ölkələri, İordaniya və İraqla tam həmrəyliyini ifadə edərək, birgə ərəb qüvvələrinin yaradılması da daxil olmaqla, kollektiv təhlükəsizlik mexanizmlərinin gücləndirilməsinin vacibliyini qeyd edib.