BAKI, VOA, Nailə Babazadə
Qətər hakimiyyəti paytaxt Doha yaxınlığında yerləşən və ABŞ-ın regiondakı ən mühüm hərbi mərkəzlərindən biri olan Əl-Udeyd hava bazasını hədəf alan pilotsuz uçuş aparatı (PUA) hücumunun qarşısının alındığını elan edib.
VOA xəbər verir ki, Qətər Müdafiə Nazirliyindən verilən rəsmi bəyanatda bildirilir: "Qətər Hava Hücumundan Müdafiə Qüvvələri Əl-Udeyd hava bazasını hədəf alan PUA hücumunu zərərsizləşdirib". Hadisə zamanı Qətər Daxili İşlər Nazirliyi təhlükəsizlik səviyyəsini ən yüksək həddə qaldıraraq, əhalini pəncərələrdən və açıq sahələrdən uzaq durmağa, qapalı məkanlarda qalmağa çağırmışdı. Bir müddət sonra təhlükənin sovuşduğu və vəziyyətin normallaşdığı elan edilib.
Bu hücum fevralın 28-dən etibarən İsrail və ABŞ koalisiyasının İrana qarşı başlatdığı genişmiqyaslı hərbi əməliyyatın tərkib hissəsi kimi qiymətləndirilir. İran rəsmi Vaşinqton və Təl-Əvivin zərbələrinə cavab olaraq ABŞ bazalarının yerləşdiyi Qətər, Birləşmiş Ərəb Əmirlikləri (BƏƏ) və Bəhreyn kimi ölkələrdəki hədəfləri hədəf alacağını bəyan etmişdi.
Xatırladaq ki, ABŞ və İsrailin İranın daxilinə endirdiyi zərbələr nəticəsində İranın ali lideri Ayətullah Əli Xameneyi və bir çox yüksək rütbəli rəsmi həlak olub. İran Səhiyyə Nazirliyinin sözçüsü Hüseyn Kermanpurun son məlumatına görə, münaqişənin başladığı gündən bəri İranda 926 nəfər həyatını itirib.