BAKI, AzerVoice, Orxan Qədirzadə

ABŞ xüsusi təyinatlı qüvvələri ötən ay Hind okeanında Çin istiqamətindən İrana doğru hərəkət edən bir gəmidə əməliyyat həyata keçirərək hərbi məqsədlərlə istifadə oluna biləcək avadanlıqları müsadirə edib.

AzerVoice-un verdiyi məlumata görə, müsadirə olunan yük İranın ənənəvi silah sistemlərində istifadə edilə biləcək komponentlərdən ibarət olub və sonradan məhv edilib. ABŞ qüvvələri gəmidə Şri-Lanka sahillərindən bir neçə yüz kilometr aralıda üzərkən yoxlama aparıb. Əməliyyatdan sonra gəminin yoluna davam etməsinə icazə verilib.

Eyni vaxtda İran mediası Oman körfəzində bir neft tankerinin İran tərəfindən ələ keçirildiyini bildirib. Fars agentliyinin məlumatına görə, gəmidə Hindistan, Şri-Lanka və Banqladeş vətəndaşı olan 18 ekipaj üzvü olub.

Hormozqan vilayətinin rəsmisinə istinadən bildirilir ki, tanker 6 milyon litr qaçaq dizel yanacağı daşıyıb və naviqasiya sistemlərini söndürmüş vəziyyətdə aşkarlanıb. İran qüvvələri son illər körfəz bölgəsində qanunsuz yanacaq daşımaları ilə məşğul olan gəmilərin mütəmadi olaraq saxlanıldığını açıqlayır.

Qeyd edək ki, İranda yanacaq qiymətləri dünyanın ən ucuz qiymətləri sırasındadır və bu da yanacağın qaçaqmalçılıq yolu ilə digər ölkələrə daşınmasını gəlirli edir.

İran ötən ay da “icazəsiz yük daşıdığı” əsas gətirilərək bir tankeri ələ keçirmiş, bunun hər hansı ölkəyə qarşı cavab tədbiri olmadığını bildirmişdi.

Son hadisə ABŞ-ın Venesuela sahilləri yaxınlığında bir neft tankerini ələ keçirməsindən iki gün sonra baş verib. Vaşinqtonun açıqlamasına görə, həmin gəmi Venesuela və İran mənşəli neft daşıyıb. ABŞ Maliyyə Nazirliyi Venesuelaya İran İslam İnqilabı Keşikçiləri Korpusu və Hizbullah ilə əlaqələrə görə 2022-ci ildə sanksiyalar tətbiq edib.