BAKI,AzerVoice, Orxan Qədirzadə

Hizbullahın rəhbəri Naim Qəssəm bildirib ki, təşkilat İsrail hücumlarının dayandırılması üçün dövlətin seçdiyi diplomatik xətti dəstəkləyir. O, eyni zamanda hökumətin İsraillə son danışıqlara mülki nümayəndə cəlb etməsini tənqid edib.

AzerVoice xəbər verir ki, Qəssəm televiziya müraciətində deyib ki, Livan hakimiyyəti 2024-cü ilin noyabrında əldə olunan atəşkəs razılaşmasının icrası və hücumların dayandırılması üçün diplomatiyaya üstünlük verir və Hizbullah “bu istiqamətin davam etdirilməsini” dəstəkləyir.

Lakin o, hökumətin İsraillə onilliklərdən sonra ilk dəfə keçirilən mülki səviyyəli görüşdə iştirak qərarını “səhv addım” adlandırıb və geri çəkilməyə çağırıb. Qəssəm avqust ayında ordunun Hizbullahın tərksilahı ilə bağlı öhdəlik götürməsini də “günah” adlandırıb.

Onun sözlərinə görə, bu güzəşt “nə İsrailin mövqeyini dəyişəcək, nə də işğal və aqressiyanı dayandıracaq”. Qəssəm iddia edib ki, İsrail və ABŞ Livanı təzyiq altında danışıqlara məcbur etmək istəyir.

“Onlar bizi yer üzündən silmək istəyirlər. Biz isə özümüzü də, xalqımızı da, ölkəmizi də müdafiə edəcəyik. Hər şeyimizi qurban verməyə hazırıq və təslim olmayacağıq”, — deyə o vurğulayıb.

Qəssəm İsrailin bir ildir qüvvədə olan atəşkəsi pozduğunu, Hizbullahın arsenalının zəiflədiyini, yüksək rütbəli komandirlərin — o cümlədən keçmiş baş katib Həsən Nəsrullahın — öldürüldüyünü bildirib.

O deyib ki, Hizbullah Livan hakimiyyəti ilə əməkdaşlıq edir və “Amerika və İsrailin ölkənin daxili işlərinə qarışmasına yol verilməməlidir”. Bu cür şərtlərin Livana dikta edilməsini “qəbuledilməz” adlandırıb.

Livanın Baş naziri Nəvvaf Səlam isə bəyan edib ki, son görüşlər yalnız keçən ilki atəşkəs razılaşmasının tam icrasına yönəlib və genişmiqyaslı sülh danışıqları anlamına gəlmir.