Bakı,AzerVoice, Orxan Qədirzadə
İsrail Ordusu Qəzza zolağında HƏMAS-ın yerli komandirlərindən birinə qarşı hava hücumu həyata keçirdiyini bildirib.
AzerVoice xəbər verir ki, ordunun məlumatına əsasən, zərbə nəticəsində HƏMAS-ın istehsalat qərargahının təchizat bölməsinin rəhbəri Əla Əl-Hədidi öldürülüb. Onun şənbə günü Qəzzanın müxtəlif rayonlarına endirilən hava zərbələrindən birində hədəf alındığı bildirilir.
HƏMAS komandirin öldürüldüyü barədə rəsmi açıqlama yaymayıb.
İsrail Ordusunun məlumatına görə, hava hücumları HƏMAS-a bağlı bir döyüşçünün İsrail nəzarətində olan əraziyə keçməsinə cavab olaraq həyata keçirilib. Baş nazir Benyamin Netanyahu bildirib ki, zərbələr nəticəsində təşkilatın beş yüksək vəzifəli üzvü öldürülüb.
Qəzza zolağının Səhiyyə Nazirliyi isə hücumlar nəticəsində azı 20 fələstinlinin həlak olduğunu açıqlayıb. Nazirlik ölənlərin mülki və ya silahlı şəxslər olmasına dair əlavə məlumat verməyib.