BAKI,AzerVoice

Fars Körfəzi Əməkdaşlıq Şurasının baş katibi Casim əl-Budeyvi yaxın zamanda Körfəz ölkələri arasında vahid turizm vizasının tətbiq olunacağını elan edib. AzerVoice xəbər verir ki, bu layihənin başlaması üçün Şuraya üzv ölkələrinin daxili işlər nazirliklərinin pasport idarələri birgə texniki iclaslara intensiv hazırlıq işləri aparır.

Açıqlama Riyadda yerləşən Şuranın Baş Katibliyində keçirilən 39-cu ümumi pasport rəhbərləri iclası çərçivəsində verilib. Budeyvi iclas iştirakçıları ilə görüşündə, gündəlikdə olan məsələlər və o cümlədən, turizm vizası layihəsinin son mərhələyə çatdırılması istiqamətində texniki qrupların gördüyü işlər barədə məlumat alıb.

Baş katib Körfəz ölkələri arasında pasport sahəsində əməkdaşlığın möhkəmləndirilməsi, qabaqcıl təcrübə mübadiləsi və birgə təhlükəsizlik üçün atılan addımları yüksək qiymətləndirib. O, bu təşəbbüsün regionda nəqliyyat və gediş-gəlişin asanlaşdırılması, ortaq təhlükəsizlik məqsədlərinə töhfə verməsi və Körfəz xalqlarının və liderlərinin gözləntilərinə cavab verdiyini vurğulayıb.

Budeyvi həmçinin qeyd edib ki, bütün ölkələr vahid komanda ruhu ilə sürətlə dəyişən texnoloji və təhlükəsizlik çağırışlarına uyğun şəkildə addım atmaq üçün koordinasiyalı şəkildə çalışırlar.

Vahid Körfəz turizm vizası region daxilində turizmin inkişafına təkan verəcək mühüm regional təşəbbüs kimi qiymətləndirilir.