BAKI, AzerVoice

Oman, ABŞ-ın İranın nüvə obyektlərinə qarşı həyata keçirdiyi hücumu qəti şəkildə pisləyib.

AzerVoice xəbər verir ki, bu barədə Oman Xarici İşlər Nazirliyinin (XİN) yaydığı bəyanatda bildirilib.

Qeyd olunub ki, həmin hücumlar beynəlxalq hüququn pozulmasıdır və regionda münaqişənin genişlənməsinə imkan yaradır.

“Oman Xarici İşlər Nazirliyi ABŞ-ın İran ərazisindəki obyektlərə etdiyi birbaşa hava hücumları nəticəsində yaranan eskalasiyadan dərin narahatlığını bildirir və bu hərbi təcavüzü qəti şəkildə pisləyir. ABŞ-ın bu addımı müharibənin miqyasının genişlənməsinə imkan yaradır və BMT Nizamnaməsinə, o cümlədən güc tətbiqinin qadağan olunmasına dair beynəlxalq hüquq normalarına ziddir. Bu eyni zamanda dövlətlərin suverenliyinə və onların sülhməramlı nüvə proqramlarını inkişaf etdirmək hüquqlarına qarşı açıq müdaxilədir” - deyə, bəyanatda qeyd olunub.

Qeyd edək ki, ABŞ Prezidenti Donald Tramp iyunun 22-ə keçən gecə ölkəsinin Hərbi Hava Qüvvələrinin İran ərazisində üç nüvə obyektinə – Fordo, Nətənz və İsfahana qarşı uğurlu hücum həyata keçirdiyini açıqlamışdı. O, həmçinin İranı İsrail ilə münaqişəni dayandırmağa çağırmışdı.

Xatırladaq ki, Omanın xarici işlər naziri Bədr əl-Busaidi ABŞ və İran arasında nüvə proqramı üzrə dolayı danışıqlarda vasitəçi kimi iştirak edən əsas fiqurlardan biri olub.