BAKI, AzerVoice
Beynəlxalq Atom Enerjisi Agentliyi (BAEA) bəyan edib ki, ABŞ-ın həyata keçirdiyi hücumlardan sonra İranın nüvə obyektlərinin xaricində radiasiya səviyyəsinin artması ilə bağlı heç bir məlumat daxil olmayıb.
AzerVoice xəbər verir ki, bu barədə agentliyin X sosial şəbəkəsində etdiyi paylaşımda deyilir.
“İranda, o cümlədən Fordo, Natanz və İsfahan nüvə obyektlərinə hücumlardan sonra BAEA təsdiqləyir ki, bu obyektlərin hüdudlarından kənarda radiasiya səviyyəsinin artması barədə heç bir xəbər daxil olmayıb” - deyə, paylaşımda bildirilib.
Qeyd edək ki, ABŞ Prezidenti Donald Tramp 22 iyuna keçən gecə ölkəsinin Hərbi Hava Qüvvələrinin İran ərazisində üç nüvə obyektinə – Fordo, Natanz və İsfahana qarşı uğurlu hücum həyata keçirdiyini açıqlamışdı. O, İranı münaqişəni dayandırmağa çağırmışdı.
Xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək səviyyəli hərbçi, o cümlədən İran Silahlı Qüvvələri Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər ölüb. İran BMT Təhlükəsizlik Şurasının hadisə ilə əlaqədar fövqəladə iclas keçirməsini istəyib.
Bu hücumlara cavab olaraq isə İran Ordusu İsrailə qarşı "Həqiqi vəd III" adlı əməliyyat keçirib. Təl-Əviv, Qüds və digər bölgələrə yüzlərlə ballistik raket buraxılıb.