Bakı,AzerVoice
Livan sərhədində qarşıdurmalar davam edərkən, ABŞ İranın dəstəklədiyi Hizbullah və İsrail arasında cəbhənin qarşısını almaq üçün diplomatik səy göstərir.
Buna baxmayaraq, İsrail ordusu Livan sərhədində Hizbullaha qarşı hücuma hazırlaşdığını açıqlayıb.
İsrail Ordusunun Şimal Komandanlığı general-mayor Ori Qordin verdiyi açıqlamada Livan Hizbullahına qarşı "həlledici hücuma" hazırlaşdıqlarını bildirib.
Qordin, Qəzza müharibəsi başlayandan bəri Livan sərhədində baş verən qarşıdurmalarda əksəriyyətinin Hizbullah üzvləri olan ümumilikdə ən azı 500 yaraqlının öldürüldüyünü iddia edib.
Komandir minlərlə Hizbullah hədəfinin məhv edildiyini iddia etsə də, Hizbullahın hələ də ciddi döyüş potensialının olduğunu iddia edib.
“Çoxdandır gözlədiyimiz an gəlib və Hizbullaha qarşı döyüş qaçınılmazdır”-deyə o bildirib.
Qeyd edək ki , oktyabrın 7-dən bəri Livan sərhədində ümumilikdə ən azı 532 nəfər həlak olub.
Onlardan 342-nin Hizbullah yaraqlısı, 104-nün isə mülki şəxs olduğu təsdiqlənib. Buna baxmayaraq Qordin açıqlamasında mülki itkilərdən bəhs etməyib.
Bundan əlavə, İsrail ordusunun paylaşdığı məlumata görə, Livanın həyata keçirdiyi hücumlarda ümumilikdə ən azı 18 əsgər və 13 mülki şəxs həlak olub.
Oktyabrın 7-də HƏMAS-ın silahlı qanadı İzzəddin əl-Qəssam Briqadalarının təşkil etdiyi Əl-Əqsa tufanı ilə başlayan Qəzza müharibəsində son vaxtlar Hizbullah ilə İsrail arasında qarşıdurmalar daha da şiddətlənib.
Hizbullah lideri Həsən Nəsrullah deyib ki, müharibə olacağı təqdirdə “onlar heç bir qayda və sərhəd tanımayacaqlar”.
İsrail ordusu həmçinin Livanda hərbi əməliyyat üçün əməliyyat planlarının təsdiqləndiyini açıqlayıb.
Digər tərəfdən, İsrail Müdafiə Qüvvələri (IDF) Qəzza zolağının cənubunda yerləşən Xan Yunisdə mülki şəxslərdən bölgəni boşaltmalarını istəyib.
İsrail ordusunun bu səhər verdiyi açıqlamada, Xan Yunusda "humanitar yardım zonası" olaraq təyin olunan ərazidə HƏMAS-ın fəaliyyət göstərdiyinə dair kəşfiyyat məlumatının alındığı iddia edilib.
Bölgədə güclü hücumların olacağını bildirən İsrail ordusu mülki şəxslərdən Xan Yunusun qərbində yerləşən Əl-Mavasi qaçqın düşərgəsinə getmələrini istəyib.